Home minister dawnsawn dan tur
Union Home minister Amit Shah, BJP president ni bawk chu Citizenship (Amendment) Bill chungchang sawi turin October 5, 2019 khian Aizawlah a lo zin dawn niin media hrang haangah tarlan a ni. Aizawla Amit Shah zin tur thu leh CAB chungchang sawi a tum thu hi Assam Finance Minister leh North East Democratic Alliance (NEDA) convener Himanta Biswa Sarma chuan September 23 khan Silchar-ah a sawi.
Mizoram sorkar lam chuan Home minister-in Mizoram a rawn tlawh tur thu hi official-in an la dawng lo niin a lang a, chutihlaiin Mizoram BJP lam chuan an dawng tawh thung. Home minister hian Mizoramah hian CAB chungchang a sawi dawn niin phai lam media-te chuan an tarlang a, he thu hi BJP kaihhruai NEDA hotupa Himanta Biswa Sarma ngeiin a puang a ni.
CAB hi kan duh loh thu chiang takin kan lantir tawh a, Mizorama political party hrang hrangten kan duh loh thu kan sawi tawh. Tun hnaia NEDA inhmuh khawmnaah hmar chhak state-a chief minister hrang hrangte'n Home minister hmaah ngei hian CAB an duh loh thute an sawi chhuak a, Meghalaya CM chuan CAB kal tlang pui a nih hmaa hmarchhak state hotute kawm turin a ngen nghe nghe.
CAB hi kumin January-a Lok Sabha-a an pass ang ni lo, hmarchhak mila ennawna pass tum a nih thawmte pawh a lo lang ṭan a. Keini tana pawimawh ber chu, "CAB thar thawh tum hi Mizoram leh hnam tan a him nge him lo?' tih a ni ang. He zawhna rilrua inzawt chung hian, Home minister lo kal tur hi a thu ken azira kan dawnsawn a ṭha awm e.