Loneitute tana pension scheme

Sorkar laipuiin lo neitute tana pension scheme a duan Farmers' Pension Scheme, Pradhan Mantri Kisan Maandhan Yojana (PMKMY) chu tun hnai khan Mizorama hman ṭan theih turin Agriculture minister-in a hawng. 

Loneitute kum 60 an tlin hnua pawisa an lakluh theihna tura scheme siam hi a lawmawm takzet a, ngaihsak hlawh vak ngai lo loneitute tan a hlu dawn hle a ni. Thlai leh thei thar chhuah danahte ṭanpuina tur sum ruahmanna tam tak awm ṭhin mah se, a taka loneituten an mamawh chu an kuta sum lut hi a ni. An eizawnna piah lamah intunnunna tur sum an mamawh a, he PMKMY hnuaia sum hi ṭhahnem viau lo mah se ngaihsak an nih avang hian an lawm hle ang tih a chiang. 

Tun hmaa sorkar hna­thawkte an hlut zual chhan chu pension an neih leh medical reimbursement an nei thei ṭhin kha a ni a, sorkar hnathawk leh thawk ve lote inkar a zau hle ṭhin. Tun hnaiah sorkara thawk ve lote tan pawh pension lâk theih dan hrang hrang a lo piang ve zel a, chumi piah lamah health care scheme hrang hrang hmanga invenna tur a awm ta nual mai. Hengte hi Mi­zoramah hian kan ngaihsak tawk lo ṭhin a, sorkar hnathawk kher lo pawhin an dawn theih dan hi hai chhuah tur a awm nual mai. 

Sorkar laipui hma­laknaa PMKMY hnuaia loneituten pension an nei tur hi an lawmpuiawm takzet a, hemi entawn hian sorkar hnathawk ni lo midangte pawhin pension an neih theih dan ruahmanna hi sorkar hian ngaihtuah chhuak thiam se. Sorkar hna kan inchuh nasa lutuk hi tlemin a ziaawm deuh ang a, loneitute pension scheme thar hian state sorkar pawh ngaihtuahna thui zawk seng turin kaihruai thei se a duhawm khawp mai.