Sorkar leh a sum hmanna

Mizoram sorkara officer, under secretary chin chung lam zawng zawngte chu information technology (IT) lam hmanrua - laptop, notebook, tablet leh an anpui zinga eng emaw ber lei a phalsak. Secretary-te chuan Rs 80,000 chin an lei thei. Additional Secretary leh Joint Secretary-in Rs 60,000 man chin an lei thei a, Under Secretary leh Deputy Secretary-ten Rs 40,000 man chin an lei thei ang. 

Tunlai khawvel ṭhang zelah hmanraw ṭha zawk leh tunlai zawka hnathawh hi a ṭul a, hei hi sorkar hnathawhnaah pawh a ṭul hle tawh a ni. Kan sorkar officer liante hian hmanraw ṭha ber ber neih hi an mamawh tawh a, hna ṭha zawk leh chak zawk, dik leh fel fai zawka an thawh theihna tur a nih phei chuan sorkar hian insenso hi a huam tur a ni ang. 

Chutihlaiin tun hnaia Secre­tariat-a thawk hotu lian chin tana laptop leh a tlukpui hmanrua lei theihna an siam ta mai hi chu mipuiin awm lo an titlang hle a, thil danglam tak a ni. Officer liante hian anmahni hman tur sorkar sum aṭangin an lei thei tihna tluk a ni a, sorkar office-a hman tur leh dah hlen tur leina pawh ni lo, officer ta tur sorkar pawisa aṭanga leina an ruahman hi chu a mak khawp mai. 

A nihna takah chuan tunlai khawvelah laptop leh a tlukpui hmanraw dang hmang thiam chin chuan mimalin an nei deuh vek tawh a, kan sorkar officer lian zingah hian a hmang thiam leh mamawh chuan an lei tawh hlawm ngei ang. Hetianga a hranpaa sorkar sum aṭanga officer mimal ta tur leina an duang hi sorkar inrenchemna dang nen a in persan hle a; sorkar meeting-a tui uma (packaged drinking water) sem ṭhin pawh titawp duh khawpa inren sorkar chet dan hi a mak takzet a ni. 

Mi chhungkaw innghahna tling zirtirtu lâk tawh sa meuh pawh 'a dik lo a awm palh takin' tia ennawn duhtu kan Chief Minister zahawm tak hian sorkar suma officer liante laptop leh a tlukpui thil dangte leina tur ruahmanna siam hi 'ennawn' tir leh se mipui rilru na hi a reh deuh ang.