Union Home Minister lo kal hun hi

Union Home Minister Amit Shah chu October 5, 2019 hian Aizawlah a lo kal dawn a; Joint NGO Coordination Committee (Central YMA, MUP, MHIP, MZP, MSU) ṭhukhawm chuan, Amit Shah-a lo zin hunah Citizenship Amendment Bill (CAB) an duh lohzia lantir nan lungawilohna lantir an rél a; an hmalakna tur chu thlâwp turin Mizo zawng zawng an sáwm. 

Amitn Shah hi tun hnaia Mizorama a lo kal ṭum hnihna tur a ni dawn a, kum 2018 Aseembly inthlan dawn khan a lo kal. A lo kal hmasak zawk hi chu inthlan dawn hnai a ni a, political party tana campaign tur a nih bawk avangin Mizo mipui nawlpuiin an ngaihsak vak lo a, chutihlaiin a party mipuite tan chuan thil hlu tak a ni thung. 

Union Home minister a nih hnuah a vawikhatna atan Mizoram a rawn tlawh leh dawn ta a, a lo kal chhan tur hi tun thleng hian a la chiang lo hle. Mizoram sorkar lam chuan tun thlengin ziakin thuchhuah engmah an la siam lo a, sorkar official ṭhenkhatte'n zawhna an chhan danin hmarchhak huap handloom exhibition hawng tura lo kal tur niin a lang. Home minister lo zin tur avang hian, a hmuah dan tur leh a dawnsawn dan tur relin Mizoram sorkar thuneitute chu tun hnaiah an inhmukhawm tawh a ni. 

Hetihlai hian Mizoram sorkar hian tun thlengin Union Home minister lo zin tur hi mipui hnenah a la puangzar miah lo a, ziaka hmuh tur engmah a la awm lo. Mizoram sorkar ber a ngawih lai hian, Assam lama BJP hotupa Himanta Biswa Sarma chuan September 23-ah daih tawh khan Silchar-a a thusawinaah Amit Shah-in Mizoram a tlawh tur thu leh CAB chungchang sawi tur a nih thu hi a lo puang tawh thung. 

Engpawhnise Mizorama Bru lo kir ṭan a nih hunlai vel, CAB tharthawh tumna boruak inmun lai takin 'handloom lam hawng turin' Union Home minister a lo zin dawn niin a lang a; Mizoram hmakhua a ngaih vang leh, Mizo mipuite hmasawnna tur lam ngaihtuah tura lo zin tur han ni hlauh se a lawmawm ngawt ang!