AMC term hmasa sum hman dan

Aizawl Municipal Corpo­ration (AMC) term hman zawh tak chhung khan AMC inrelbawlnaah sum hman nasa takin a pung a; AMC term hmasa ber kum tàwpna 2015-16 ah inrelbawlna atan Rs. 2,15,24,172 a ni. MNF kaihhruai AMC sorkarin kum 2019-20-a administration atana sum an hman chu Rs. 12,21,86,874 a ni - kum 2015-16-a sum hman aṭanga kum 2019-20-a a punna chu 467.67% a ni. 

AMC-in hna­thawhna atana a sum hman pawh la ni phak chiah lo, inrelbawlna (administration) atana sum a hman ringawt pawh hi a tam tham hle a, chik zawka chhui chuan inrelbawl dan fel tawk loh hrin chhuaha puh loh theih a ni lo. 

2016-20 chhungin telephone-ah Rs 20,05,186 an hmang a, internet-ah Rs 92,39,448 an hmang a, a belhkhawmin telephone leh internet-a an hman ringawt hi Rs 11,244,634 a tling. He pawisa hi dik taka hman ral pawh lo ni ta tehreng se, AMC hnathawktu zat leh phone bill leh internet bill-a hman ral zat hmehbel tum hian a sang hle tih a lang. 

'Refreshment' tih head-a cheng nuai 39 hmanna rawn awm nawlh maite hi 'Meeting, Training, etc' tih hnuaiah a awm si lo a, eng atana hman tak ni ang maw? Hetihlai hian a hranpain 'Miscellaneous' tih hnuaiah cheng vaibelchhe 1.8 an la hmang tho bawk a, head hranpa siam loh 'a dangte' tih hnuaiah cheng vaibelchhe hnih an hmang tling ṭep tihna a ni. 

AMC kal ta khan 'Stationery' tih hnuaiah Rs 1,11,17,640 an hmang a, kum nga chhungin cheng vaibelchhe khat aia tam hnathawhna hmanrua leina atan an seng ral. Medical-a sen ral cheng vaibelchhe hnih chuang hi chu hriselna kaih­hnawih thil a nih avangin hriat­thiam theih tur a ni ang. 

Zin veivahna 'Tours & Travels' atana Rs 1,15,33,037 an seng ral chunga 'Petrol & Diesel' atan a hranpaa Rs. 92,64,596 an sen belh bawk avangin a pahniha belhkhawm chu cheng vaibelchhe hnih a chuang a; AMC term kal taah khan zin veivahna senso leh an lirthei tui manah kum nga chhungin cheng vaibelchhe hnih aia tam an hmang tih hi an enkawl Aizawl mipuite hian an hre kher awm lo e. 

Lirthei hman hawh­na man 'Vehicle hiring charge' ah MNF kaihhruai AMC khan Rs. 1,83,27,705 an seng a, cheng vaibel­chhe hnih dawn an hman­na hi bawlhhlawh paih lirthei an hire-na man kha lo ni ta se, bawlh­hlawh sawngbawlna 'Solid Waste Management' lamah cheng tluklehdingawn hnih chuang (Rs. 23,23,92,089) an seng tel bawk a ni. 

Aizawl khawpui enkawltu tura mipuite thlan tlinin inrel­bawlna (administration) atana sum an sen dan en hian, tute pawh AMC-ah hian lo tling se sum hman dan fel zawk leh ruahmanna thar kan mamawh tih a lang chiang hle a ni.