Kawngpui siam tlo loh chhan

Mizoram PWD (Highway Division) chuan, Mizoram kawng­pui chhiat hma chhan langsar zual pali an tarlang a; chungte chu: i.Ruahsûr nasa leh fûr rei lutuk. ii. Lungte hmante kawng siam nana tling pha (standard quality) a tam lo. iii. Estimate siam laia kawng dinhmun (condition)-te chua taka siam a nih meuh chuan a chhe zual nasa tawh ṭhin. iv. Kawngpui dunga lirthei sil, in sakna bungraw dah leh cement concrete chawhna atan kawng­pui kan hmang.

PWD lam insawi­fiahna hi a mal malin han chhui zui dawn ta ila, a pawmawmin chhuanlam ṭha tak a tling ṭheuh a ni. Ruah tui a tam em avangin kawng a tlo loh phah a, lung a chang ṭha tawk lo a, kan kawng dinhmun hi a takah kan hmuhpui ṭheuh angin siam a awlai lo a, kawngpui dim nachang kan hre lo bawk. Heti chunga PWD lamin rim taka thawk chunga kawngpui an siam ṭhin hi an fakawm a, fur laia lei minte rang taka an thian fai ṭhinte hi mipui pawh an lawm hle a ni. 

Harsatna lam thlir chuan kan rama kawngpui ṭha ve thawkhat tak a kal ve ruak maite hi a mak viau zawk a; nimahsela, kan ram anga tlang ram ve tho, sik leh sa leh ruah tui tlak dante pawh danglam thui lutuk lo state ṭhenawmte aia kawngpui kan nei chhe ṭhinte hian ngaihtuah a tithui hle. Mipui nawlpuiin kawngpuia in sakna bungrua kan chhawp mai ṭhinte hi chu khawtlang hruaitute nena ṭang ruala sutkian theih a nih a beiseiawm a, khaw/veng tinah hian in sa hi an tam lutuk lem lo bawk a, ngennate siama inchinfel theih mai a nih a rinawm. Fur ruahtui tla tur hi kan ven theih loh a ni chungin a tui luanna siam lamah ṭan lak theih a ni a; lung chang ṭha tawk lo zingah pawh hian lung chhe lutuk lo deuh hman theih dan hi ‘quality control’ lama ṭan kan lak chuan a tih theih hmel.

Kan ram kawngpui chhia avangin mipui kan rûm a, an siam ṭhat vanga lawmthu sawina Assembly House meuha kan neih hnuah kawng chhia vangin truck an tlan duh lo hlauh thung a; tuna kan harsatna hre chung hian, sorkar hian theihtawp chhuahin kawngpui siam ṭhat hna hi han thawk tak tak teh se.