Plastic khap i thlawp ang

Aizawl Municipal Cor­poration (AMC) chuan, August 1, 2019 aṭangin Ai­zawl khawpuiah plastic pan chi hman a khap ṭan a; AMC mayor chuan, mipui vang liau liaua plastic khap a nih dawn thu a sawi. 

Plastic hman hi mihring hriselna atan a ṭha lo a, hman nasat hian hriselna nasa takin a khawih thei. Hei bakah hian plastic kan hman nasat a, kan paih mumal loh avang hian luia cheng nungcha tam takin an tuar a, kan paih danin a zir loh avangin leilungin a tuar bawk a, leimin ṭhenkhat pawh hi heng thil avanga lei nghahna tlahniam zel hrin chhuah ni theiin an sawi.

AMC thuneitute hian plastic pan chi (polythene bag/sarâng etc) hi thil khap duh vang hrim hrima khap an ni lo a, an thuneihna lan­tir an tumna lam ni loin mipuite tana thil ṭha an ngahtuah vang zawk a ni. Plastic hmanin nghawng 

ṭha lo a nei thei a, plastic kan hmanaah hian thil dang ṭawih ral thei hman theih a nih tho avangin mipuite pawhin a tirah tuar deuh mah ila plastic loa awm theih hi kan zir a ngai dawn ta a ni.

Plastic hi awl­samin ṭangkai viau mah se harsatna tam tak a thlen a, a inven hunlaia ṭan kan lak loh chuan kan tlai lutuk palh ang tih a hlauhawm. Tunah pawh hian kan tlai tawh ṭan mek niin mithiamte chuan an sawi a, thil engkim maia plastic kan hmang nasa lutuk hian a ṭha lo zawngin min ei lêt chho mek niin an sawi.

AMC hi a khap theitu ni mah se mipuiin kan zawm duh miau loh chuan inven sen a ni dawn lo. Mipuiin ṭha taka kan thlawp a, kan ṭan tlan erawh chuan he khapna thupek hi a hlawhtling ngei thung ang.