Mau/rua-ah thu dik hriat a ngai

ZPM party chuan thuchhuah siamin, Mizoram sorkar flag­ship programme, rua/mau chung­changah mipui náwlpui tana thu dik hriat har khawpa thu inchuh a awm ṭhin chu pawi an tih thu an tarlang a; mipuiin thu dik hriatna chanvo an neih avangin, thu dik tak puang chhuak ngei turin Mizoram sorkar an phût. 

Assembly budget session hnuhnung berah Mizoram chief minister chuan mau/ rua chi ṭha, Brandisii chu Mizorama lo thleng mai tur a nih thu leh thla tin nuai khat tal lo thawn an tum thu Assembly House-ah a sawi a; July 15-ah CM vek hian rua/mau chi ṭha eng emaw zat Mizo­rama a lo thlen tawh thu leh 3,000 vel chu hardening ti tura a ṭiak phun a nih thu a sawi. 

Tun hnaiah RTI Act hmanga zawhna an chhannaah Horticul­ture department chuan July 29, 2019 thleng khan rua/mau chi Mizorama thleng a la awm loh thu te, supply tura inremna (agreement) siampui an la awm loh thu te, hmun dang aṭanga rua/mau chi ṭha supply-tu tur thlan a la nih loh thute tarlan a ni thung.

Mizoram sorkar flagship prog­ramme ni si, hemi chungchanga thu a saisa ta lutuk hi chu mipuiin thudik an hriat a ṭul takzet a ni. Chief minister meuh chuan thudik a sawi tura ngaih a ni a, chutihlaiin Horticulture depart­ment lamin RTI Act hmanga zawhna an chhanna leh kan chief minister thusawi hi a inkalh tlat a ni. 

Mizoram mipuite hian thudik hi an hre thei tur a ni. He flagship programme pawh hi mipuite pual, mipuite chan tur a ni a, chumi thu kal dana thil chiang lo awm hi sorkar hian a sawifiah ngei tur a ni. Mau/rua chungchanga chief minister thusawi leh Horticulture department-in RTI Act hmanga zawhna an chhannaah hian a khawi zawk hi nge dik lo? A tisualtu zawk chuan mipui hriatah thil awm dan sawifiah an ba a ni.