Mizoram kawngpui dinhmun

Tun hnaia Mizoram hmun hrang hranga kawng siam hnathawh mek endika kal Central YMA hruaitute chuan, Mizorama inkalpawhna kawng siama hna thawh mekah a huna thawh zawh loh, contractor hminga mi dangin an thawh, hnathawh mumal awm si loa running bill pek leh thil dang ṭha lo a awm thu an sawi a, "A lungchhiatthlak takzet a ni," an ti. 

Mizorama hna­thawh tam zawkah hian con­tractor hming lem hawhin hna hi thawh a nih hial a rinawm a, construction hna lama hnuhma nei miah lo leh thiamna pawh nei lote'n political party behchhanin hna an thawk a, chumi nghawng chhe tak chu ramin a tuar mek a ni. Congress-in rorelna vawnfung an chelh lai khan contractor ni lo hnena contract hna sem hi hmuh tur a tam hle a, sorkarna a inthlak hnuah pawh MNF hnuaiah a tam hlei hlei emaw tih  mai tur a ni zui a, a vanduaithlak hle. 

Contract tenau deuh hmanga political party mi leh sa induhsakna awmte hi chu thil ṭha ni hauh lo mah se hriatthiam theih chin a la awm a; nimahsela hna lian tham leh pawimawh em em, inkalpawhna hnaah meuh pawh hming lema hnathawk duh an awm zelte leh hna hmuh hralh chhawng ṭhinte hnena sorkarin hna a la pe zel hi ram a hmangaih loh thlak hle tiin a sawi theih ang. 

Ram hmangaihna kan tih hi rorelna vawnfung chelh tura intihsiakna leh inelna ngawt hi a ni lo a, rorelna ṭhutthlenga ṭhut tawh hnua hnathawh danah hian ram hma­ngaihna chu a lang zawk tur a ni. Tunah hi chuan kan kawngpui siam mek endiktute'n a dinhmun dik tak an hmuh hnua an thu­sawi chu, "A lung­chhiatthlak takzet," tih a ni a, hetiang thu hriat hi a ram pum tan a ṭha lo takzet reng a ni. 

Minister ni chunga hming lem hawha contract hna la hauh tlat mai te, contractor pawh ni lo, ruling party mi leh sa nih vanga contract hna lian lo thawh ve ngawt mai te, hnathawhna tura sum leh hmanrua pawh nei loin contract hna chhânga hralh chhawn leh te hi ram pawi khawihna a tling. Hetianga kan la kal zel mai hi chu Central YMA-te hmuh dang ang hian a lungchhiatthlak a ni.