ILP endik

Central YMA hmalaknain August 1 zan khan Mizoram pumah hnam dang, Inner Line Permit (ILP) nei lote enfiah rûnpui neih a ni a, ILP nei lo hnam dang 1,198 hmuh chhuah a ni. Heng mite hi police station-a hlan an nih hnuah Court-ah an hruai a, Court thu angin an khuaah an thawn lêt a ni.

ILP nei lo hnam dangte Mizoramah an luh phal a ni lo a, Mizoramah an lo lut duh a nih chuan ILP neih a ngai. ILP nei tur chuan Mizoram aṭanga sponsor-tu neih a ngai a, Mizorama hnathawk turin a duh apiang luh theih a ni lo. He ILP hi awm lo se, hnam dang, a bikin vai kan tihte hi, Mizoramah buaipuiawm tham an lo luh ngei a rinawm.

Tunah pawh hian Mizoramah hna hrang hrang thawkin vai kan tihte hi an tam ta hle mai. Heng zingah hian sorkar hnathawk te, sumdawng te, nitina inhlawh chawpte an awm a, a tam ber ni a lang chu cement mistiri leh an helper-te an nih hmel. Heng hnam dangte hian kan thawh theih loh, kan thawh thiam loh leh kan thawh peih loh hnate an thawk a, Mizoram chhunga eizawn hi a hlawk miau avangin dan bawhchhiain ILP nei loin an lo lut ngam a ni.

An lo luh chhan leh an hnathawhte chu eng pawh lo ni ta se, tuna enfiah ngai ta ber chu kan hnam dang heti zat zan khat chhung leka man theih tur ILP nei loa an lo lut thei mai hi a ni. Tun hnaia thil thleng hian thuneitute tiharh se, ILP nei lo vai lut ru tur hi tun aiin veng uluk se a ṭha hle. 'Kan ramri chin ni a an pawm ngei pawh hauh ngam lo, kan ram chhunga ILP nei loa vai lut ru tur pawh veng hneh thei lo sorkar,' tia sawi zui an nih lohna turin sokarin ṭan a lak zual a ngai e.