Ṭhalaite puh vek hi

Tun hnaia a thusawinaah cabinet minister pakhat chuan, Mizo ṭhalai zingah hnathawh tum lo, kum upa zawkte châwm hlàwm an tam thu sawiin, "Ṭhalaite an thatchhiat avang hian kan ramin tunah tuar rih lo mah se, kum 10-20 ah chuan kan ram hi a tlabal hle ang tih a rinawm," a ti a; ṭhalaite thawh hreh nei lo tura fuihin, châwm hlàwm nih zak turin a chah. 

Minister ṭha­hnem­ngaihna hi thlirna kil khat aṭang chuan a dik a, kan ṭhalaite hi an taima tawk lo a, an thawkrim tawk lo a, chuvangin kan hmalam hun hi a him lo palh mai ang tih hi thil hlauhawm tak a ni. Hnathawh chu sawi loh hnathawk hleithei loa zu leh ruihhloa talbuai tam tak an awm a, heti zela kan kal chuan kan ram hmabak hi a êng vak lo tiin a sawi theih awm e. 

Chutihlaiin, "Eng vangin nge Mizo ṭhalaite an thatchhiat a, eng vangin nge chawmhlawm mai an lo nih tak?" tih zawhna hi zawh lêt ve a ṭul ta. Mizote hi hnam thatchhia tia sawi tur kan ni ngai lo a, pi leh pute hunlai aṭang tawhin mahni inchawm zo, kutdawh awm lohna ram anga chhal theih kan ni a, keimahni tawkah kan intodelh hle a ni. 

Tun hnaia kan ṭhalaite an lo thatchhiat tak chhan tam tak zinga pakhat chu politics kal dik lo a ni a, a thawkrim aia thawkrim lo an din chan zawk chang a awm a, a phute aia phu lem lo hmelhriat nei ṭhain sorkar hna an hmuh theih zawk chang a awm a, hnathawh tur mumal leh ṭha min kawhhmuh thei lo sorkar kan hrawn rei tawh vang pawh a ni tel bawk ang. Sorkar ber a inrem fuh a, roreltu ṭha an awmna ramah reng reng ṭhalai an thatchhe ngawt lo a; hna thawh tur a awm a, an thawhrim rah an tel theihna ramah ṭhalai dawngdah leh thatchhia an awm ngai meuh lo tih hriat tel a ṭha awm e. 

Kan ṭhalaite hian hmasawn tuma rualel chungin taimak chhuah lehzual se, ṭhalai taimate tana kawng hawnsak turin sorkarin ṭan la zel se, kan ram ṭhalaite dinhmun mek hi kan ram rorelna hlimthla a ni tih kan ram hruaitute hian hre tel se a ṭha khawp mai.