Bawrhsap leh an huam chin

Mizoram sorkar chuan district headquarters thar pathum - Hnahthial, Khawzawl leh Saituala deputy commissioner (DC) turte a ruat a, bawrhsap tharte chu an hna thar zawm nghal tura tih an ni. 

Hun rei tak chhung district thar duha lo beisei tawhte'n district an han nei ta hi an lawmpuiawm a, district-in a ken tel hamṭhatna hrang hrangte pawh an dawng tel nghal dawn niin a lang. Mizoramah mipui nuai 10 vel kan cheng chungin tunah chuan district 11 kan nei ta a ni ber a, chawh rualin district pakhatah mi nuai khat pawh kan cheng dawn ta lo tihna a ni. 

Engpawhnise district thar chungchang hi chu politics-a thu inchuh lian tak a nih tel avangin thlir dan a inang thei dawn lo a, district ṭhuthmun khua leh a chehvel tan chuan hei aia lawmna sang zawk hi a tam hauh lo ang. Tunah chuan sorkarin DC thar a ruat ta a, DC a dah tharte hi an hna zawm nghal tura tih an ni a, chumi zawmzia chu heng district thar pathumte hian DC chu an nei ta. 

Chutihlaia ngaihtuah tithui zawk erawh chu heng DC-te hian an rorel chin tur ramri (boundary) hi an hria em, tih hi a ni. Khawi district thar mah hi ramri tihchian a la ni lo a, an huam chhung tur anga lang khaw ṭhenkhatin an duh loh thute an chhuah a, district danga awm mek khaw ṭhenkhatin district thar tura beh an duh zawk thute an chhuah ve mek bawk. 

Entirna'n Thing­sulthliah Village Council, tlawmngai pawl leh political party zawng zawngte chuan chief minister, an bialtu MLA leh chief secretary hnenah Sai­tual district-a awm an duh loh thu an thlen tawh. Tunah hian Thingsulthliahah hian eng thil emaw thleng ta se, Aizawl DC hmalakna tur nge Saitual DC hmalakna tur ni ta ang? Sorkarin DC thar a dah tawh a, a hnathawhna tur huam chin tal thliar fel loa a dah hi chu a tihfel tur tifel hmasa loa kalpui a ang lek lek a, heti lo deuha rorel theih hi a nih ngei hmel si a.