Sorkar inthlak hnuah buaina ngai

Central YMA hruaituten tun hnaia Mizorama kawng­pui siam an tlawhnaah contractor ni lo kawngpui siam hna lo thawk ve an awm thu an sawi a, kawngpuiin a tlawh tur khaw mite pawhin thuneitute hnenah an thlen pawha awmzia a neih loh thu an sawi lang bawk. 

Kawngpui chhia avangin kan buai a, politics-a inchirhthehna ber pakhat a tling. Kan kawngpui chhiat chhan hi sorkar lam chuan lung chang ṭha kan neih loh vangte leh ruah tui a tlak tam vangte a nih thu an sawi ṭhin a, kawngpui ṭhenkhatah chuan motor lian a tlan tam chu kawngpui tlo loh chhuanlamah an hmang fo bawk. A chhan tam tak awm thei zinga chhan lian ber pawl nia lang chu hnathawktu tura thlan ni loin hna an thawh nasat vang a ni a, a hnathawktu tak takten contract hmutute hnen aṭanga an lei chhawn fo avangin Mizoram kawngpui a tlo lo tih hi phat theih a ni lo ang. 

Mizoram hi kum 1987-a state a nih hnuah political party pahnih chiah­in an la enkawl a, ro an inrel chhawk pawhin sorkar hna­thawh danah thil danglam hmuh tur a tam lo ṭhin hle. Tun hnaia Cen­tral YMA lam thil hmuh dan pawh hi mi vengva deuhin an hmuh leh sawi fo, sorkarin a bengkhawn duh lem loh a ni a, CYMA a au chhuah hnu hian kan kawngpui siam danah hian danglamna awm thei tak maw?