Ramri ngaihven a ngai

Bairabi Zophai hmuna Assam mite’n biak-in leh dawr tur in an sak chu ṭhiah a nih theihna atan hma la vat turin MZP chuan chief minister an ngen.

Ramri buaina awm chinfel dan tur hi kan chief minister hian a hriat thu a sawi tawh a, a taka hman a la hun lo a ni mai thei a, kan ṭhenawmte hian buaina cho niawm takin hmalakna hi an nei fo mai. MZP-te hian Zophaia banner an tar ringawt pawh Assam lam chuan phalsak loin an che nghal mai zel a, tunah Zophaiah in an rawn sa a nih chuan thlir liam mai mai chi a ni lo ang.

Hetihlai hian Mizo­ram sor­kar chuan ramri ngaih­tuah­tu tur core committee a din a, chu pawh chu an ṭhukhawm hleithei lo. Anni hi inhmukhawmin thu ṭha tak rel ringawt mah se ramria harsatna chinfelna a la tling dawn chuang lo a, keini lamin a core committee-te hial kan dinlaia a khat tawka min nek rengtute dodal hi kan ngam tur a ni a, kan huam tur a ni bawk ang.

Tunah hi chuan a khat tawkin ramri lamah thil a thleng a, Assam lam mite’n thuk zawka kua an hreuh tumna lam hlir kan hria a, keini lam chu a meeting zawng te, a chinfel dan hriat thu sawi zawngte hi kan thlen tawk a la ni. Ṭha taka kan dawh hram hram laiin kan zirlai pawlte chuan vuak leh kutthlakte hial an lo tuar tawh bawk a, chuvangin tuna kan kal dan en hi chuan ramri buaiah hian a dawih zawka ṭang kan ang sawt khawp mai.

Keini lamin zah takin Assam lam kan ngaichang a, kan sorkar hotute thu kan ngaichang bawk a, chutihlaia kan ramri ber zahsak duh loa min nek zel avangin ramri chungchang hi sorkar hian tih tak taka a ngaihven a hun tawh takzet a ni.