Corporation din thar
National Handloom Day-a thusawitu Commerce & Industries minister chuan, corporation-te din thar leh an tum thu a sawi a, "ZOHANDCO, ZIDCO leh KVIC-te chu fûke kima kal turin bul kan ṭan leh chauh a, MIFCO pawh a pawimawh tehreng nen, a lo thi lek lek hman a, tunah thawktu 20 vel awm chê chêin, din thar leh kan tum. Corporation-te ṭha taka din thar leh tur hian, hun la duh deuh mah se, kan ennawn leh vek dawn a ni," a ti.
Mizorama public sector undertaking ṭhenkhat chu a lo titawp tawh a, a ṭhen mimal kuta hlan tura ruahman a ni hman bawk. Sorkar insawifiahnaah chuan, ‘Kum 2001-02 aṭanga 2007-08 chhunga CAG Report chuan Mizoram sorkar chu corporation-te performance siam ṭha tur leh, chu chu a harsa a nih chuan titawp (closure) tura hma la turin thu a lo râwn tawh,’ tihte a tel a; heng corporation-te hi a tirah a bul ṭanna tur sorkarin sum a pe a, anmahni inenkawla thawh chhuah neia hlawkna tel thei hial tura ngaih ni mah se, beisei angin an kal ta lo.
Tunah sorkar thar a piang a, corporation-te din thar a, tihchak tumin ṭan an la leh dawn. Hei hian rah ṭha tak pawh a chhuah theih rualin an kal sual tawhnaah sorkar hi inring se, tun hma anga pawisa luan ralna mai a chan tawh lohna tura a inhmakhua a ngai hle ang. Mizoram sorkar hian thawh chhuah nei si lo sum hmanna siam belh hi a mamawh tawh lo a, ram tana ṭangkai tak ni thei si, ṭangkai lo leh heksak tak kan din leh palh ang tih a hlauhawm khawp mai.
Tute emaw tihlawmna tur leh an pawimawhna tur duan thar a, board chairman-a an awm theihna tur zawn chawp mai mai a ni palh ang tih a hlauhawm. Hetihlai hian fing taka rel a, uluk taka duan chuan heng corporation-te hi nakin zela sum thawk chhuak thei tura duan theih an nih a beiseiawm a, chu chu sorkar pawhin a tum ber tur a ni ang.