Municipal corporation leh state sorkar

Sorkar laipuiin Aizawl Municipal Corporation inrel­bawlna tura sum a pek chhuah chu Mizoram sorkarin a hun taka pe chhuak loin a hrêng ṭhin a, kum 2015-16 leh kum 2019-20 inkar khan AMC hnena a hun taka pawisa a pek chhuah loh avangin Mizoram sorkar chuan cheng 1,39,86,671 a chawi. 

February 16 hian Mizoram khawpui Aizawlah municipal corpo­ration an inthlang dawn a, Aizawl Municipal Corpora­tion inthlan lo awm tura thu inchuh lian deuh ber pakhat chu state sorkar thawhpui theih tih leh state-a sorkarna vawnfung chelhtute kher an ngai lo, tih a ni awm e. 

State-a sorkarna vawnfung chelhtu MNF lam chuan state sorkar thawhpui theih ngei thlang tling turin mipui an sawm a, eptu lamin state-a sorkarna siamtu chu tu pawh ni se municipal corporation chuan kalphung tur a nei sa a, state sorkar tihbuai theih a nih loh thu an sawi ve thung. 

Heng thu inchuh awm karah hian Mizoram sorkar chuan AMC pawisa tur a hun taka a pek chhuah loh avangin cheng nuai 139 zet mai tun hnai kum li chhungin an lo chawi tawh a ni. Hemi aṭanga thlir hi chuan state sorkar hian AMC pawisa tur hi a hreng khawtlai thei lo a nih hmel a; 15th Finance Commission hnuaiah hian sorkar laipuiin municipal corpora­tion-te tana pawisa a pek hi ni 10 chhungin an pe chhuak ngei ngei tur tih a ni a, an pek chhuah tlai chuan a state sorkar zawk hian pawisa an chawi zel dawn a ni.

Term liam taa AMC-a a vawnfung chelhtu MNF-te kha an hun tam zawk chu state sorkara Congress hnuaiah an hmang. Term hmasa AMC kha state-a sorkarna siamtu Congress vangin an hnufum a, hna an thawk thei lo tih lam sawi loin a MNF ngei pawhin AMC-a an chet ṭhat thu chu campaign au hlaah an hmang ve mek bawk. 

Hei vang hian state sorkar leh municipal corporation inzawm theih dan leh kal hran dan a awm tih hi chu kan hun tawn tawh aṭangin a hmu theih awm e.