Ar vulhtute harsatna

Ar vulhtu intêlkhawm pawl, All Mizoram Poultry Farmer Association (AMPFA) chuan, Mizoram chhunga vulh ngei arsa lei turin Mizo mipui an ngen a; Assam aṭanga ar puah sa lalut an awm avangin Mizorama miten harsatna an tawh thu an sawi a, heng Assam arte hi a hrisel tawk loh chang a awm tih an sawi. 

Sumdawnnain a ken tel chu 'inelna' (competition) a ni a, tunah hian tualchhung ar vulhtute'n state pawn lama ar vulhtute leh anmahni dawrturte nen inelna an nei mek. Assam lamah hi chuan ar hi an lo vulh rei tawh zawkin a rinawm a, arnote leh a chaw lakluh a awlsamin a tlawm zawk ang a, a hralhna tur an neih zau avang leh an hmunhmaten a zir avangin an ar vulh zat pawh a tam zawk ngei ang tih a rin theih. 

Hetianga inel tura kan chhuah zalen a nih chuan Mizoram lam zawk hian an hneh lo zel mai thei a, kan Mizo puite kan puih theih dan awlsam chu arsa kan lei dawnin mipuite min ngen anga Mizoram chhunga vulh ngei chauh lei hi a ni ang. Kan hnampui ngeite'n eizawnna atan hmangin ar an vulh a, anni dawr hi kan tum hram hram a ṭha khawp mai. 

Chutihlaiin sumdawnna khaw­velah hi chuan inelna hi a awm lo thei lo a, a man chung­chang leh a quality thlengin a inang lo ve thei. Hemi chungchangah hian Mizoram ar vulhtute pawh state pawn lam el thei tur khawpin ṭang se, Mizoram chhunga mi ngei mipuiin an lei duh ngeina turin ṭang sauh sauh rawh se. 

Mizorama kan ran vulhte'n a daih lo a nih ngawt loh chuan eng ran pawh hi lakluh phal loh emaw, khuahkhirh emaw hi a hun ta hle a, Mizoram chhunga mite'n an duhthala sa man an chhiar tur erawh sorkarin veng tel chungin, ar vulhtute harsatna tawh mek hi inzirna atan i hmang ang u.