Village Council harsatna tawh hi

All Mizoram Village Council Association (AMVCA) chuan,  sorkar laipuiin village council-te'n tualchhung hmasawnna atana hna an thawhna tur sum cheng nuai 4,544 a pek chu V/C-te kuta pe chhuak thuai a, August 2019 chhung ngeia V/C-te pe turin Mizo­ram sorkar an phût.

V/C-te harsatna tawh hi harsatna dang nen a inang lo a, pawi­sa an dil a ni lo a, anmahni pawisa tur lo kal tawh an kutah a la luh loh avangin an kuta hlan vat turin an dil a ni zawk. Tawngkam danga kan sawi dawn chuan, sorkar laipui atanga V/C-te sum lo kal Mizoram sorkarin a kawl luihsak a, a pe chhuak duh lo, tiin a sawi theih hial awm e.

Sorkar hmasa khan heng pawisate hi a pe chhuak lo a, V/C lamin harsatna an tawk tawh. Sorkar thar a piang a, V/C-te harsatna hrethiam inti takin LAD minister chuan February, 2019-ah daih tawh khan pawisa an pek chhuah tur thu hi V/C kal khawm hmaah a puang tawh a; nimahsela tun thlengin an la pe chhuak lo.

Sorkar hian pawisa a nei lo deuh a nih pawhin kan V/C-te harsatna thlen khawpa an pawisa tur hrensak hi chu a tih loh tawp tur a ni a, V/C-te hnathawhna tur liau liaua pawisa lo kal hrensak hi chu a fel lo hle a ni.

Sorkar hian he thil hi hre loin a hreng khaw­tlai a ni lo a, LAD minister ngeiin a hriatpui a, an pek chhuah tur thu a sawi hnu pawhin an la pe chhuak chuang lo. Mizoramin hma a sawn dawn chuan thingtlang kilkhawr ber thlengin hmasawnna a thleng tur a ni a, chumi atan state-in sum a dah thei lo a nih pawhin sorkar laipui atanga V/C-te hnathawhna tur pawisa lo kal hi chu hrensak loin pe chhuak nghal rawh se.