DC level-a inbiakna

Home department chuan Zophai hmuna Muslim hoin biak-in (mosque) an sak mek chungchangah Kolasib DC chu Hailakandi DC nen indawr turin an hriattir. Ramri chungchang ngaihtuahtu Core Committee an ṭhutkhawm ṭumin hmun khawih danglam loh tur an tiha (status quo hmuna) biak-in sak a ni chu ṭha a tih loh thu sawi a ni. 

Tun hnaia Coun­cil of Ministers ṭhu­khawm chuan, Mizo­ram ramri atan Bengal Eastern Frontier Regulations (BEFR) 1875 an pawm thu an chhuah tawh a, tuna DC pahnih inbiakna tur hi chu Mizoram sorkar ngeiin, "Kan ram chhung a ni," a tih chhunga mi vek a ni. A lan danah tak chuan kan ram tia kan pawm chhunga thil thleng vangin mi state DC kan va dawr dawn a ni ta ber mai. 

Thil ngaihtuah ngun ngai tak chu Council of Minister-te hi Mizoram ramriah buaina a awmlai takin an ṭhukhawm a, BEFR 1875 an pawm thar leh lai tak hi a ni. A nihna takah chuan July 6, 2019-ah Vairengte khaw daia sipai cinema hall hlui chu Assam Forest-te'n sa ṭhain office atan an luah a, he mi hnua BEFR 1875 pawm a nih thu cabinet-in an han rel chawpchilhte hi ramri chungchanga zirlai pawl lungawi lo thawi dam tumna a ang a; an thurel hi media hmaa puang­zar loin minister zinga zirlai pawl hruaitu hluite'n MZP hruaitute kawmin an hrilhfiah a nih kha. 

Tunah Zophai lam­ah boruak a awm leh a, hei hi kan ram tia cabinet-in a pawm leh hnuhnawh chhunga mi vek a ni a, chumi chingfel tura district pakhat DC tirh hi tunah rih chuan a ṭha tawk a ni mai thei a; nimahsela state pahnih inkar buaina chingfel tak tak tur chuan state thuneitu lute an indawr a ṭul.