Darlawn district beisei hi

Darlawn District Demand Committee (DDDC) chuan thuchhuah siamin, district thar pathuma awm tur khuate cabinet meeting-in a tihchian takah, hmar tlangdung khuate Saitual district-a telh an ni lo chu lawmawm an tih thu an tarlang. Darlawn district siam a nih ngei theih nan DDDC-in hma an lak zel tur thu an puang nghal. 

Darlawn hian hun rei tak chhung district neih hi an lo ngiat tawh a, tun thlengin an la hlawhtling lo. Tun hnaiah sorkarin district-a puan tawh pathum chu tipuitling turin an huam chinte a tifel a, SP leh DC thar an dah fel ta a, district thar pathumin a tak a chang dawn ta.

Hetihlai hian Darlawnin hun rei tak chhunga an lo beisei district an la hmu lo a, hetia a lan dan chuan an hmu hnai lo mai thei. Mipui nuai 10 chuang awrh awmna enkawl turin district 11 a awm dâwn ta a, chumi baka district dang siam leh chu thil awlsam tak a ni tawh lo mai thei a, sorkar tan a hranpaa sum dah pawh a harsat tawh hmel. 

Chutihlaiin kan sorkarin district a pek dan en hi chuan, a area leh a mipui zat lam hi a dah pawimawh ber a ni lo mai thei a, a nawrtu lamin an nawr nat deuh chuan an pe mai ang pawhin a sawi theih ang. Khaw inhnai te te, darkar khat vel lek leka inhlatah district hmunpui a hung ta thluah si a, hemi tehna aṭang hi chuan Darlawn pawh hi district hmu awm an nih lohna a awm bik lo ang. 

Sorkar hian district thar din turin tehna fel tak - a zau zawng, a mihring cheng zat, district headquarters aṭanga a hlat lam emaw a zam chuangin a lang lo a; Darlawn-in distrist thar mamawhna an sawi hi midangte aiin a nep bik hauh lo a, tehna ṭhenkhatah phei chuan a awm ber ber an nih dan pawh a awm a, District hi an la dil chhuak nge nge lo ang tih a sawi theih loh.