CYMA-in kawngpui vei zel se

Chief minister leh Central YMA hruaitute tun hnaia ṭhukhawm chuan Mizorama kawngpui siam chungchang an sawiho a, kawng siamtu zingah thawk ṭha lo leh thawk thei lote chu insawifiah tura hriattir a, lungawina a awm loh chuan thawk thei lo tura puan (black list) an remti. 

Hmasawnna ruhrel pawi­mawh ber zinga pakhat chu kawng­pui ṭha neih a ni a, Mizoram hi kawng­pui nei chhe zinga mi kan ni hi a van­duaithlak hle. Sor­karna vawnfung chelhtute an inthlak a, kawngpui ṭha tak kan nei dawn emaw tih tawh hnuah CYMA hruaitute chu kawngpui siam­lai enfiahin an zin chhuak a, an thil hmuh chhuah chu 'a lung­chhiah­thlak' tih a ni mai. 

Thil reng reng hi a diklohna hmuh a nih tawh hnuah chuan a dik lohna siam ṭhat dan zawn hi kan tih tur ni awm tak a ni a, chutihlaia PWD changtu minister-te nen sawiho leh a ni hian a diklohna siam ṭhat lam aiin a diklohna inhrilhfiahna lam a hawi lek lek a; kawngpui kan neih ṭhat lohzia leh a siam danah a lungawithlak lohzia hmuh a nih tawh hnua a tidik lotute hrem tur zawnga kal mai lo a, a hmaa CYMA leh PWD thawhhona thuthlung awm tawh sa hrula inremna siam thar leh hi chu a kawng a kual thui deuh dawn niin a lang. 

Dik taka sawi chuan contrac­tor hming in hawhsak leh contract hralh chhawn veng theitu chu sorkar a ni a, PWD minister leh thawktute hian an duh phawt chuan hetiang mite hi an man chhuak nghal vek thei a; tunah erawh chuan sawiho nawn leh phawt hi a ṭhaah an la ngai a nih hmel.

Hetihlai hian CYMA-in hetia sorkar a rûm ṭhaih hi thil lawmawm tak a ni a, political party-in hetiang thil an sawi chhuah hian 'politics-a inbeihna a ni' tiin thuneitu lam hian an beng per leh mai ṭhin a, CYMA a rawn lan takah chuan sorkar pawh an phi deuh ruai niin a lang. 

CYMA-in kan kawngpui an vei hi a lawmawm a, kawngpui siam dan a taka an hmuha a lungchhiahthlak thu an sawi chhuah hian sorkar hi beng harh ngei rawh se.