Thawkrimte tana hlawkna ni se

Siaha bialtu MLA Dr K Beichhua, minister of state chuan, sorkar tharin a kalpui tur SEDP hnuaiah thawkrimte tan lo chuan dinchhuahna a awm loh thu tun hnaia a bial a fannaah a sawi a; inthlan a zawh tawh avangin political party tih bik nei loa ram hmasawnna atan lungrual taka thawh a pawimawh thu sawi. 

Mizorama kan buaina lian tak pakhat chu thawkrim loa hlawk kan tum tlat ṭhin hi a ni. Chumi belhchhah tur chuan sorkarna vawn fung chelhtu apiangte hi thawkrim lem loin an hlawk ṭhin niin a lang a, khawi party mi emaw nih avanga an hlawk ngawt ṭhin avang pawh hian politics hi sumdawnna ang maiin an kalpui ta a ang a, a pawi hle a ni. 

Sorkar thar a piang a, an thawm aṭanga teh chuan hnathawh tak tak an tum hle niin a lang a, a lawmawm khawp mai. Minister ṭhenkhat an hnathawh pawh hriat mang loh, an awm leh awm loh pawh hriat hran mang loh khawpa ṭangkai lote pawh an awm ṭhin niin a lang a, tunah chuan thil a danglam ta deuh dâwn a nih hmel. 

Chutih laiin Mi­zoramah hian sorkar thar a pian hian beiseina säng tak nen kan thlir ṭhin a, an hun bul lamah hian thu ṭha tak takte nen bul an ṭan ve fo. A pawimawh ber chu an thusawite a taka an chantir hun hi a ni ang. 

Sorkarna changtu nih avang maia hlawk nghal tura inngaih ngawt te, chumi beisei ringawta politics khel pawl kan awmte hi a vanduaithlak a; Mizoram hi thawkrimte hlawkna ramah a takin i chantir tawh ang u.