India ni pawimawh

Vawiin hi India ramin zalenna a hmuh champhaphak a ni. Hun rei tak chhung British awpna hnuaia awm ṭhin kha, August 15, 1947 khan zalenna a hmu a, he ni lawmna hi kum tin ropui taka hman ṭhin a ni. 

Mizoram pawhin India zalenna ni champha hi a lawm ṭhin a, vawiinah pawh Mizo­ram hmun hrang hrang­ah he ni hi lawm a ni ang. Tun hma deuh kha chuan India zalenna ni leh ram ni pawimawhte hian ngaih pawimawh a hlawh viau ṭhin a, a kal ngei tura tih chin sorkar hnathawkte mai ni loin sorkar hnathawk dangte leh sikul naupangte pawhin he ni hi hlim takin an lawm ṭhin. 

Tlem lai deuh aṭang khan sorkar hnathawkte hi ram ni pawimawh lawmnaah hian an kal taima ta lo hle a, sorkarin action a la bawk si lo a, sorkar inthlahdah chu ram ni pawimawhah a lang chhuak a ni ber. Sorkar hotu lu lam an au chhuak ta hial a, ram ni pawimawh ngai pawimawh tura inchahin an invaukhan titih ta hial a ni. 

Kan dinhmun chu eng pawh ni se, kan chenna ram hi India ram a nih miau avangin India-in zalenna a hmuh champhaphak hi he ram tana ni pawimawh a ni a, a lawmna hi kan ngai pawimawh thiam tur a ni. Sorkar hna­thawkte lehlek phei chuan kan hnah­thawhna, kan ei bel ber sorkar ni pawi­mawh hi kan dah pawimawh tur a ni a, 'chawlh' anga ngaih ngawt hi thil fel lo a ni ang. 

Sorkar lamin ram ni pawi­mawh ngaih pawimawh nachang hre chho zel se, a hnathawkte pawhin hei hi vawng reng se, India ni pawimawh bik kan neihte hi i hlut thiam ang u.