Sangha khawi leh a department

Fisheries minister chuan, sangha chi, a nih tur ang ni lo supply chu pawm a nih tawh dawn loh thu a sawi a, sangha chi dik lo supply an awm chuan hék turin sangha khawitute a chah. 

Fisheries Minister thusawi hi ngun taka ngaihtuah ngai a ni a, Mizorama Fisheries department atana kan pawisa sen zat, sangha khawia eizawngte sum lakluh zatte ngun taka chhut chuan, mi ṭhenkhat ṭawngkam duhâm deuhten, “Fisheries department-te hi chu titawp mah ila kan ram hi a kal ngaiin a kal ang, sum sen thlawnna mai a ni,” an tihte pawh hi a dik ta emaw tih mai awl tak a ni. 

Fisheries department kan nei emaw nei lo emaw sangha khawia eizawng, he lama tui leh a ngaihna hre deuhte hi chuan an kalpui reng dawn a, sorkar inrawlh kher lo pawha sum ṭhahnem tak hai lut theite an awm. He mi letling chiah hian sorkar aṭanga sangha khawina tura sum tam tak dawng a, a taka hlawhlinpui si lo hi tam tak an awm bawk. 

Minister thusawi hi thil thleng tak tak ṭhin niin a lang a, sangha chi supplier zingah a tira an intiam ang sangha ṭha supply leh si lo an awm ṭhin. Minister-in department lam hna­thawktute a vaukhan tel pawh hi thil lawm­awm tak a ni a; sor­kar-a thil supply-a thil fel lo awmah supplier ringawtin thil a kal thui pui ngam lo a, department lamah thurualpui an neih ṭhin vang a ni fo. 

Fisheries minister ṭhahnem­ngaihna hi a fakawm a, tun hma ang lo takin a department enkawlah hian danglamna thlen ngei turin hna thawk se, Fisheries department hi pawisa senna mai ni loa sum lakluhnaa chantir tumin dik, huaisen leh chak takin ke pen zel rawh se.