Hunpui thlirletna

Tun hnai khan Mizorama kum 2019 Krismas leh 2020 kumthar lawm dan leh a kaihhnawih thilte thlirlêtna Home minister hoa hman a ni a, Police hotu te, Aizawl DC aiawhte leh Central YMA office bearer-te telin boruak muanawm taka hunpui hman liam a ni chu lawmawm an ti. 

Tun hma deuh khan Krismas leh kumthar vuatvetah hian chan­chin duhawm lo tak tak hriat tur a awm leh ṭhin a, tualthihna rapthlak tak takte hriat tur a awm bakah buaina chhuak sawi turte thlengin a awm ṭhin a nih kha. Tun hnaiah hian hunpui hman kan thiam ta deuh pawh a ni thei a, heng hunpui hunlai hian buaina lian tham chhuak sawi tur a awm tam ta lo hle a, hmasawnna duhawm tak a ni. 

Mizorama dan leh thupek kengkawhtute hian hunpuiah puitu ṭha tak an nei ṭhin a, khawtlang ṭang rualin mahni huam chhungah duty-te insiamin boruak muanawm tak a awm theihna turin hma an la ṭhin. Thawk khatlai kha chuan khawtlang duty zingah dan phal baka che ṭhinte thlengin an awm a, tunah erawh chuan khawtlang hruaitu lam pawhin tihâwm leh tihâwm lo chinte an thliar thiam ta hle. 

Hunpuia ngaihtuah thar ngai ta erawh chu halpuah leh halmawi khap chungchang hi a ni. Thuneitu lamin khauh takin thupek a chhuah a, mipuiin an zawm ṭhat ṭhin tehlul nen Aizawl khawpuia veng tam tak hian an zawm ṭha ta lo hle. Hei hi a mawia khap anga lang a, a taka a hal luite hrem chuang loa kalpui zel chi nge ni a, awmze neia hal dan siam emaw, tun aia khauh zawka khap tur, tihte ngaihtuah zui a ṭha ang. 

Mizoram puma hunpui lawm­na hun muanawm tak kan hmang thei hi a lawmawm a, dan leh thupek kengkawhtu lam leh tlawmngai pawlte an fakawm a, mipui nawlpuiin hunpui hman kan thiam chho ta tial tial niin a lang bawk.