Sorkar hmasa hnathawh chhunzawm

Congress sorkar policy, New Economic Develoment Po­licy (NEDP) hnuaia Entrepre­neurship Development Scheme (EDS) kalpuii chu chu MNF party kaihhruai Mizoram sorkarin a kalpui zel dawn a, chief minister pawhin a remti tawh a ni. 

Tun hmaa Mizo­rama sorkar thil tih a ṭhuanawp chhan tam tak kha chu a bul ṭantu sorkar an tlak hnuah a thlaktu lamin an chhunzawm duh ṭhin loh vang a ni ber. Tun hnaiah Congress hunlaiin hlawhtling takin EDS kalpui a ni a, eizawnna bul ṭanna a nih piah lamah hnathawk tura ṭhangthar zawkte cho phurtu ṭha tak a ni a, MNF-in sorkarna an chan hnua an chhunzawm tur hi a lawmawm hle a ni.

Tun hnaiah ‘sorkar hmasa kih hnawka tâng’ tihte ṭawngkamah a awm ṭhin a, ‘inchibaina hunah kan hmang’ han tih maite hriat a ni a, hei hi sorkar inthlak hlim 

ṭawngkam a ni ṭhin. Tuna sorkar thar lo piang hian sorkar hmasa kih hnawk an sawi tawh lo a, an thil tih ṭhatte chhunzawm an tum niin a lang a, a fakawm hle. 

Hetihlai hian sorkar thar lakluh a nih hma hauha tele­phone hmanga NEDP hnuaia hnathawhte titawp tura thupek petu an awm kha a van­duaithlak takzet a, a order tichhuaktu khan a thupetu kha a sawi chhuak ngam lo a nih pawhin chhuichhuah ngei a ṭhat hmel. NEDP hnuaia hnathawh ṭhenkhat, work order chhuak tawh kut la thlak lote tihtawp tumna thawm a awm bawk a, hengte hi ‘ram hlui zia’ ni tawh se a duhawm khawp mai. 

Sorkar hmasa hnathawh ṭhat chhunzawm tura hmalatu sorkar hi a fakawm a, hemi piah lamah hian NLUP leh NEDP hnuaia hna bul ṭan tura ruahmanna awm tawh chin tal hi chu thawh zawhtir hram se a ṭha ang.