Ruihhlo do beihpui thlak a ngai

Excise & Narcotics department (END) chuan kumin kum chanve chhung, January leh June inkarah ruihhlo leh a kaihhnawih thubuai siamsakna dan NDPS Act hmangin mi 397 an man tawh a, thubuai 317 an ziak lut tawh a ni. 

Mizoramah zu khapna dan hman a ni leh ta a, zu dapin END lam pawhin theihtawpin ṭan an la. Hetihlai hian tun hnaiah Mizoramah hmuh theih khawpin ruihhlo a hluar a, hei hian chhungkaw tam takah harsatna a thlen mek a - mimal, chhungkua, veng leh khua, pawl, kohhran leh sorkar lamin theihtawp chhuaha inlungruala beih a ngai ta. 

Tuna kan harsatna tawh mek hi mipui nawlpuiin kan ngaih mai aiin a thukin a nasa tawh niin a hre deuhte chuan an sawi. Ruihhlo hi khaw chhak lam aṭangin a lo lut reng a, a hming maia a venna gate kan siamte hi chu a tawlh rutu lam chuan engah vak an ngai tawh mang lo an ti hial. Hei bakah hian vairam lam aṭangin damdawi ruih theih chi a lo lut ve reng a, kan rama damdawi zuarte zingah ruih theih chi damdawi hi doctor lehkha tel loa hralh chhuak hreh lo an awm nual bawk. 

Tunah hi chuan ruihhlo ti ṭhinte dapin kan vai a, an kuta ruihhlo an kawlte hi kan man a ni lek fang a, a hlawma lo lut hi sorkar tha chakna hi chuan a khawih phak meuh lo niin an sawi a; tlawmngai pawlte (a bikin SRS) nen 

ṭang kawpa an dap theih chin pawh hi a la tlem tham hle a ni. 

Hei vang hian sorkar hian thapui thawha ruihhlo do a tum a nih chuan lirthei lut chhuak hi tun aia nasain khuahkhirin vil uluk se, ramri hmun hrang hrangah venhimna tichak se, END thuam ṭhain ralpui phiara phiar a ngai ta a ni e.