Eirûk awm lohna sorkar

Home minister chuan tun hnai khan Serchhip district-a sorkar department hrang hrang hotute DC conference hall-ah a kâwm a, "Langtlang sorkar, eirukna awm lohna sorkar din kan tum a ni tih hi officer-te rilruah chám reng se ka duh a ni," a ti. 

Mizoramah hian eirukna hi kan sawi ṭhin a, chutihlaiin eiruk avanga man emaw, hna aṭanga ban tawk emaw hi chu an la tlem hle. Eirukna hi kan duh lo tak tak a nih chuan a eiru ngei nia hriat chin hi chu hrem awm tak a ni a, hrem tawk erawh sawi tur an awm mang lo a, a mak hle a ni. 

Sorkar thar a piang a, bul an la ṭan mek bawk a. An ṭawngkam leh an chezia pawh a la ngaihnawm hle a, hnathawh tak tak an tum niin a lang. Hetihlai hian sorkarah eirukna umbo an tum tak tak a nih chuan a lu lam a fim hmasak a ngai a, chumi hnuah sorkar official lamte hi na zawka an hrek ngam a ṭul ang. 

Tuna kan kal danah hi chuan kan minister-te pawh hian ṭan la viau bawk mah se, sorkar hnathawkte hnathawh danah hian chin ṭhan ṭha lo tak an nei a, an­mahni phei chuan an eiru angah pawh an inngaih tawh loh khawpin kan kalphung (system) hi a lo dik lo (corrupt) tawh niin a lang. 

Sorkar thar hian langtlang leh eiruk awm lohna sorkar an siam duh tak tak a nih chuan sorkar hnathawkte vil ngam turin anmahni lam an fihlim hmasak a ngai a, contract leh supply pek chhuah danah dan anga an kal ngam a ngai a, chutiang taka ti ngam minister chu a department-ah danglamna a awm ngei ang tih a rin theih.