Ramriah kan buai leh ta

February 9 khan  Bairabi VC-te leh Power & Electricity department mi leh sate chu power line enfiah turin Zophaiah an kal a,  he hmuna lo awm Assam lam mite chuan Bairabi VC member-te chu kut an thlâk, he thil thleng duh lo hian Bairabi mipuite Zophaiah an pungkhawm ve nghal. He mi zan hian Bairabi aṭanga hla vak lo Assam ram chhunga Gharmura-a Mission Compound chhunga Mizo missionary-te chu Assam lam mi misual rualin kut an thlak bakah an lirthei leh chenna inte an halsak a ni.

Assam leh Mizo­ram ramriah hian tun hnaiah buaina a chhuak fo mai a, buaina chinfel tumin sorkar laipui thlengin an inrawlh tawh a, buaina a reh fel deuh chiah tihah tunah buaina dang a lo chhuak leh ta. Khaw ên laia buaina chhuak hi ramri kaihhnawih thil a ni ngei a, Bairabi VC-te hian Zophaiah ngei kut an tuar a, he thil hi a pawi takzet a ni.

Mizoram leh Assam inkar ramri hi chinfel a ni lo a, Mizoram sorkar-in 'kan ramri' a tih chu 1875-a ramri siam kha a ni a, chu ramri chu kan chuh ngam lo mai ni loin a chhungah pawh chuan nêk chêpin kan awm zel a, kan ram chhungah ngei Assam lamin kut min thlak ta hial hi ngaihtuah chian chuan a thinurthlak hle a ni.

Hetihlai mek hian politics-a hamṭhatna duh vangin kan ram hruai­tute zingah kan ramri chu Mizo mipui­te duh anga chinfel tawh nia sawite an lo awm tak tak a nih phei chuan Mizoram an hralh ṭhen ang hialah a puh theih a, tuna kan ramri anga kan police-te duty-na chin hi Mizo mipuite duh dana kan ram chin a ni lo tih chu kan zavaia hriat tlan a ni ang.

Kum 2020 kum tawp lamah khan ramriah buaina a chhuak a, chu buaina chhuak chu chinfel a ni ringawt a, Assam leh Mizoram ramri hi chu chinfel a la ni lo - kan ram chin min chuhpui tlat avangin kan ramri hi Assam duh anga chinfel ngawt theih pawh a ni lo.