NGO leh sorkar dinna

NGO Coordination Commi­ttee chuan The Citizenship (Amendment) Bill, 2016 (CAB) duh loh vangin kumin Republic Day hman tur chu boycott an tum a; Home minister-in Joint NGO hruaitute hi kawmin ram ni pawimawh a nih vanga boycott lo turin a ngen. Home minister ngenna hi NGO lam hian an ngaihtuah nawn leh tawh a, Republic Day boycott zel hi an tum tlang ta a ni. 

Home minister hian chief minister hrilh angin NGO hruaitute hi a kawm a, an thil tum chu sût turin a ngen. An thil tih tum chu CAB 2016 chu India prime minister leh Home minister hnenah pawh CM-in a thlen tawh thu leh, Mizoram leh India hmar chhak tana ṭha lo a nih avanga an duh loh thu an au chhuahpui tawh thute pawh a hrilh a ni. 

NGO lam erawh chuan CAB 2016 hi an duh lohzia hre reng chunga Lok Sabha-a an pass ta chu an hrethiam thei lo a, Rajya Sabha lama an pass leha dan thar a nih phei chuan kan ram, kan hnam tana thil pawi thui tak a nih theih avangin an duh lohzia lantirna chu kal tlangpui an tum. 

Sorkar tan pawh awm dan thiam a harsa hle ang tih a rin theih a, a party ang chuan sorkarna vawn fung chelhtu MNF hian CAB 2016 an duh loh thu hi an sawi fo tawh a; nimahsela sorkarna vawn fung chelhtu an nih angin sorkar ni pawimawh an kalpui hi a ṭul bawk si a, an dinhmun a khirhkhan hle a ni. 

Engpawhnise NGO lamin Mizoram leh hnam tana thil pawi thei an dodal hi mipuiin kan ṭawiawm a, kan zawm tlan a ṭhat hmel a; ram ni pawimawh dodal tura inzirtirna lam ni loin, kan duh loh CAB 2016 hi chu kan dodal ngam ngei tur a ni ang.