A ṭul chuan?
MNF president leh chief minister Zoramthanga chuan, Rajya Sabha-a The Citizenship (Amendment) Bill, 2016 (CAB) pass a nih lohna turin theihtawp an chhuah niin a sawi a, "A ṭul a nih chuan MNF hi NDA aṭanga inhnuhdawh kan hreh hauh lo," a ti.
Mizoram chang ni lo hmar chhak mipuite’n kan duh loh rawn Citizenship (Amendment) Bill, 2016 (CAB) hi Lok Sabha-ah pass a ni tawh. He bill pass tura nawrtu chu BJP an ni a, chu chu NDA dintu leh kaihruaitu an ni a, anni bawk hian Rajya Sabha-a nawr tlang leh tumin ṭan an la mek a ni.
Mizoram mipuiin kan duh lohzia na takin kan lantir tawh a, tharum thawh zawnga thil kalpui a nih loh avang hian mipui thawm hi a ring tawk loa ngaih ngawt chi a ni tawh lo. NESO-in total bandh an huaihawt kha mipuiin an thlawp ṭha em em a, kawngzawh a ni leh tawh bawk a, Republic Day hian boycott turin an rel bawk.
Heti taka Mizo mipuiten kan ram leh hnam tana him lo tur bill kan dodal tawh hnuah, kan chief minister berin ‘a ṭul chuan’ a la ti chauh mai hi chu mipui lawm a kim lo tawp ang. Mizote min chim ral thei mai tur, kan sakhua pawhin nasa taka a tawrh theih tur bill chu Lok Sabha-ah pass a ni tawh a, chumi bill chu Rajya Sabha-a pass tir leh tumin NDA (BJP) chuan theihtawp an chhuah mek.
NDA aṭanga chhuah hi a ṭul dawn a nih ngai chuan tun aia a ṭul hun hi a vang hlein a rinawm a, Rajya Sabha-a an nawr tlang tawh hnua lungawi loa ban ai chuan, an nawr tlang lohna tura ban ngam hi a ṭha zawk mai thei e.
Engpawhnise, Mizo mipuiin ṭang rual chuan tharumthawhna tel si loin kan theih leh thiam angin theihtawp chhuahin Citizenship (Amendment) Bill, 2016 (CAB) duh lohna kan lantir mek chu a ni a, kan roreltu party lam chuan bill pu luttu NDA lam a la âwn tlat zel a, NDA aṭanga inhnuhdawh hi eng tikah tak ‘ṭul’ ti ang maw?