Sorkar hmasa leh sorkar thar

Health & Family Welfare minister chuan tun hnai khan MIMER a tlawh a; sorkar hmasawnna hna thawh tawh pawngpaw hnualsuat an tum loh thu a sawi. 

Mizoramah sorkarna a inthlak hian sorkar hmasa thil tih a nih avanga chhunzawm duh loh te, an thil kalpui tawh hnualsuat mai te, thil ṭha tak ni thei tur pawh bawhzui duh lohte a awm ṭhin a, hei vang hian thil tam tak a hlawhchham tawh a, ramin lo tuar tawh ṭhin. 

Tun hnaiah MNF kaihhruai sorkar a ding a, anni lam hian sorkar hmasa thil tih ṭha chu tawngpawng hnualsuat mai an tum loh thu an sawi ta zauh zauh a, a lawmawm hle. Hei hi hmasawnna duhawm tak a ni a, an insawi anga an kalpui thei a nih ngai chuan ramin a rah ṭha a seng ngei ang. 

Mizorama thil hahthlak tak chu ram aia political party ngaihsak zawkna leh dah pawimawh zawk a ni fo ṭhin hi a ni. Kan party-in a hmingṭhat phah dâwn chuan ramin a chhiat phah deuh pawh pawi ti lo a, elpuite party an hming ṭhat dâwn ai chuan ramin a tawrh phah tur khawpa rorel duh kan awm ṭhin kha a pawi a, kalphung thar kan hmù hret hret dâwn niin a lang. 

Miin sorkar a enkawl dâwn a nih chuan ram a dah pawi­­mawh hmasa ber tur a ni a, chutiang tak chuan he sorkar hi kal zel se. Mizoram mipuite hian thil ṭha ti duhtu hi chu khawi party mi pawh ni se an hre reng dâwn a, sorkar hmasain thil tihṭhat a nei a nih chuan chhunzawm zel ni rawh se.