Ngaihven hlawh lo - R. Day Boycott

Republic Day vawi 70-na chu hmarchhak state hrang hrangah NGO leh zirlai pawlte huai-hawtin boycott a ni a, mipuiin an thlawp a, sorkar laipuiin tel ngei tura a tihluih theih chinte chauhin Republic Day chu an serh a, lawmpuitu mipui erawh an awm meuh lo. 

India rama ni pawimawh ber ber pathum (Republic Day, Independence Day leh Gandhi Jayanti) zingah pawh a pawimawh bera ngaih Republic Day lawmna chu boycott duh khawpa rilru natna lantir a ni. Boycott-tute rilru nat chhan chu sorkar laipuiin Citizenship Ammendment Bill 2016 tih­puitlin a tum vang a ni. He dan thar, sorkar laipuiin hman a tum mek hi hnam tlem tan ralna, sawkhaw tlemte hnuaichhiahna leh nekchep tumna nia a lan vangin, hmarchhak huam chhunga hnam hrang hrangten chi hrang hrangin an dodal a. An dodalna chu sorkar laipuiin a ngai pawimawh chuang lova a lan vangin, National Day pawimawh ber chu hmarchhak state hrang hrangten an boycott ta a. India inpumkhatna tibuai thei thu dengkhawng tak takte zar chhuah a ni a, Prime Minister leh Home Minister-te Lim hial hal a ni bawk. 

Tun ṭuma CAB dodal dan hi, tharum thawh lova sorkar laipui laka lungawi lohna lantir danah chuan a runthlak pawl tak a ni hiala a lan laiin, Central sorkar hian a ngaihven tehchiam pawhin a lang lo a, a khua leh tuiten National Day an boycott chu pawi ti awm pawhin a lang lo a, fiamthu thawh ang lekah a ngai ni maiin a lang. 

Heti taka sorkar laipui hruaituten an khua leh tuite lungawi lohna an ngaihven loh chhan hi, Prime Minister leh a thawhpuite hian National Day hi an ngai hlu tehchiam lo a ni thei a. Boycott-tuten an hlauhthawn lai tak, hnam tenau leh sakhaw tenaute hi India ramah hian ral vek se an lo duh viau a ni tak tak mai thei bawk. Chuti ni lo se, mawihawih tala pawi tih derna lantir awm tak a ni.