Zirna sang kalpui dan

Higher & Technical Edu­cation minister chuan tun hnai khan Aizawla college pali chu hrilh lawk loin a tlawh. College chhung, classroom, zirtirtute awmnate a tlawh a, college ṭhenkhata classroom pakhata zirlai inhnawh tam lutuknate pawh kal chilhin a enfiah a ni. 

Mizorama zirna kan sawi hian zirna hniam lama zirtirtu aikal lak te, classroom ṭha tawk lo te, mid day meal chungchanga harsatna awmte leh zirtirtu indaih lohnate sawi a ni a, ngaihven a hlawh viau zel. Chutih­laiin kan zirna sang kalpui dan hian sawi a hlawh tam vak lo a, mipui pawhin kan ngaihven tawk lo deuh niin a lang. 

Minister-in higher edu­cation a ngai pawimawh tih a taka lantira college-te a tlawh hi thil lawmawm tak a ni a, a hmalak dan ṭha tak hi chhunzawm zel thei se a duhawm khawp mai. Kan zirna in sangte hi a hmunhma leh classroom chungchangah pawh duhthusam lo tak takte an awm a, college ṭhenkhat phei chu an zawh tawk aia tam zirlai neite pawh an awm a ni. 

Ram pumin zirna kan vei hian a zirna hniam lam hi kan tin zawn deuh ṭhin a; nimahsela zirnaah hian a hmawr bawkna hi a pawimawh hle tih chu a takin kan hre tlang a ni. Hna zawn nikhua pawhin zirna sang lama kan result-in ngaih pawimawh a hlawh a, a sang lama kan tihṭhat hian hna hmuh pawh a awl hle zawk a ni. 

Mipui nawlpuiin zirna sang kan ngaih pawimawh deuh deuh a ṭul a, khawtlang leh pawl hrang hrangte pawhin zirna kan vei hian zirna sang lam kan ngaihthah thiang lo; Mizorama zirnain hma a sawn dawn chuan, zirna sang lam hian tun aia ngaih pawimawh a hlawh zel hi a ṭul a ni.