Aizawl kawng kama inzuarte

Aizawl DC chuan thupek chhuahin, Aizawl khawpui chhung kawngpui kam hmun eng emaw zata kea kalnaah thil zawrh khap a nih thu a puang. Khapna thupek chhuah chhan hi - kawngpui kama kea kalnaa inzawrhin mipui kal vel a tihharsat bakah, intawhsual a hlauhawm vang a ni. 

Aizawl khawpui hmun lunlai deuhah hian kea kalna leh vantlang hmuna inzuar hi hmuh tur an tam ta hle a, kawngpui lunlaia hmun zau leh awl remchangahte pawh an inzuar bawk ṭhin. Heng inzuarte hi a tam zawk chu khaw­sak harsa tak takte an ni a, an chhungkaw chawmna tur tuakin kawng kamahte hian an inzuar ṭhin a ni. 

A mihringte sum mamawhna leh an chhungkaw innghahna a ni tih hriat chuan an lainatawm a, chutihlai chuan kawngpui kama inzawrhte leh kea kalna tura siama inzawrh hi dan phal loh a ni. Hei vang hian dan ang taka kal a, kea kalna tura hmun siam bik leh kawngpui kama inzawrh hi chu khauh taka khap tlat a ṭha hle. 

Thil ngaihtuah chian ngai erawh chu hmun ṭhenkhatah kea kalna chu sawi loh motor kawngpuite khar meuhin Inrinni tukah inzawrhna hmunhma buatsaih a ni ang lawi a, hengte ngaihtuah hi chuan khawpui enkawltu tura ruatte hian awmze neia inang khat tlanga thil an kalpui a ṭha hle. 

DC lam an ni emaw, Municipal Corporation an ni emaw, Local Council lam pawh ni se dan inang tlang hmanga thil kalpui hi khawpui ṭhan zelnaah a pawimawh a; kea kalna tur leh kawngpui kam hmun remchanga inzawrh hi dan phal loh a nih avangin tihtawp ni se a ṭha khawp mai.