Zirna tihhmasawn dan tur

School Education department hotute chu tun hnai khan School Education minister hoin Mizoram zirna tihhmasawnna tur ngaihtuahin an ṭhukhawm a, an thil ngaihtuah zingah primary school aṭanga higher secondary school-te'n tuna sikul kai hun hman meka harsatna an neihte sawi lan a ni a, sikul naupangte tana sikul ṭan hun hman tlan theih tur remchang zawk sawiho a ni. 

Mizoramin zirna kawnga hma kan sawn theihna tur ngaihtuah zingah sikul ṭan hun a tel a, hi hi inhnialna chawk chhuak tur zinga mi a ni leh ngei ang. Zirna in ṭan hun tihhma a nih tirh khan sawiselna a tam hle mai a, mi ṭhekhat phei chuan kan ramin kan tlin ve dawn lo ang hialin an sawi a, tunah erawh chuan kan hmang thiam tawhin a tira kan huphurh ang he hu kha a lo ni vak lo niin a lang. 

Hetihlai hian zirna in ṭan hun tihtlai a, a hma anga kal leh duhtu hi ṭhahnem tak an awm ve tho bawk. Hei hi zirna lamin a hranpain a ṭhatpui kher lo mai thei a, chutihlai erawh chuan Mizo khawsak phunga kan chet chhuah hun ngaihtuah chuan tun hmaa mi kha kan la mil zawk niin a lang a, hei vang hian political party lam pawhin inhnialna atan an hmang a ni ta ber a, sorkarna inthlak rualin sikul kai hun pawh a inthlak dawn a ni mai thei e. 

Engpawhnise sikul kai hun hmasa angah kha chuan India rama ni chhuah hmasakna ber zinga awm siin sikul ṭan tlai ber pawl kan ni a, zirna lama kan elpui tam zawkte aiin kan hun neihte kan hmang ṭangkai tlem deuh niin a lang. Zingkarah engmah ti hman tak tak si lo, sikul bana engmah ti hman mang si loin kan zirlaite kha an nileng ve ṭhak ṭhin a ni ber mai. 

Sorkar chu thuneitu a nih angin a duh angin sikul kai hun a tidanglam thei a, sawisel leh do nghal ngawt a fel lo ang a; nimahsela zirna sikul ṭan hun tihdanglam hi zirna tihhmasawnna a ni nge ni lo tih erawh a rahah a lo lang mai dawn a ni.