Chief minister ṭhahnemngaihna

Mizoram chief minister chuan Mizoram chu khawizu leh hnute tui luanna ramah siam an tum thu Horticulture department-a officer inhmuhkhawmnaah a sawi. Thlai engkim ṭhat duhna ram, sik leh sá nuam, ruahtui tlâk dan ṭha tawka kan chen avangin kan kutah engkim a innghat niin a sawi a; eptu an nih laiin hmasawnna hnathawh dan tur an duan vek tawh thu te, raw lian chi hmun danga awm lo chi hnih chin an tum thute leh a bul ṭan dan turte a sawi. 

Kan chief minister hian ram tana ṭha tur thil tam tak a ngaihtuah tih a chiang a, ama sawi dan takin eptu an nihlai pawhin a lo suangtuah nasa ṭhin hle tih a lang. Tunah chuan hnathawk thei turin Mizoram mipuiin kan thlang tling ta a, Mizoram hi khawizu leh hnute tui luanna ramah siam a tum dawn a, a lawmawm hle. 

Kan hotupa ber hian Mizoram hi mau leh rua hmanga siam a tum ruh hle tih a lang a, a tuina a nih piah lamah amah ngei pawhin a lo bawhzui thui tawh hle tih a lang. Heng a tuinate hi sorkar tha chakna hmangin chak takin bawhzui se, a thawhpuite leh sorkar official-te pawhin a tak takin tupui ve bawk se, intodelh thei law law turin ṭan i la tlang ang u. 

Kan chief minister hun hmasaah kha chuan amahin tui tak leh thiam taka a sawi kha midangin an tuipui ve vak lo a ni mai thei a, tihhlawhtlin tak loh thil tam tak a awm a, thil ṭhenkhatte phei chu fiamthu thawhna ang lek leka hman zuite a awm. Tunah hian beidawng duh loin ruahmanna ṭha zawk nena hnathawh a tum ruh hle tih a lang a, ama sawi ang ngeiin hna hi ṭan nghalin a officer-te leh a thhawpuite pawhin ṭha zawkin thlawp tawh se a duhawm hle. 

He ram hian âtchilh khawpa eng hna emaw ber hi kan luhchilh loh chuan eizawnna tak tak thlen hleithei si lo hian kan kal naw naw zel dawn a nih hmel a, chief minister ṭhahnemngaihna rilru ang pu chung hian thuneitu zawng zawng hian hna thawk se a hlawhtling ngei ang. Chuti a nih loh chuan tun aṭanga kum li velah heng a thusawite hi kan la chhinchhiah reng ang a, a ṭhahnemngaihna hian amah leh a party ngei hi a vaw lêt palh hlauh ang e.