Rajya MP thusawi leh Mizoram sorkar

Mizoram Rajya Sabha MP K Vanlalvena chuan Parliament session kal mekah tun hnai khan thu a sawi a, Covid-19 hripui avanga Zokhawthara Indo-Myanmar Border Trade khar chu chhunzawm leh tawh turin a ngen a; sumdawng mi ṭhenkhatin sorkar hriatpui loha hmun pasarih vela ramri kal tlanga kawngpui an siam thu leh, hei hi dan loa sumdawnna kawngpui hluna a chan mai a hlauhthawnawm thu a sawi a, thuneitute chu ram pahnih inkar sumdawnna chhunzawm leh thuai tura a ngen thu a sawi.

Mizoramin MP kan neih tawh zingah tuna kan Rajya Sabha MP hi Parliament house chhunga thusawi taima ber a ni hial mai thei a, ram a veizia leh Mizoram tana thil ṭha a duhzia pawh a lang. Mizoram MP-te tan thusawina hun chan a harsatzia an sawi ṭhin a, chuti chung chuan tuna kan MP hian a tum tlat vang nge ni thusawina remchang hi a nei thei deuh reng a, a chhuanawm hle a ni.

A thusawi chhuah Indo-Myanmar Border Trade chhun-zawm tura thuneitute a nawr pawh hi thil âwm tak a ni a, dan anga sumdawnna an khar chungin dan loa sumdawnna a kal reng a, dan loa sumdawngte'n kawngpui an laih chawp thute hial India ram hriatah a sawi chhuak a ni.

Kan MP ṭhahnemngaihna hi kan state sorkar tan mualphona a chang thei a, kawngpui pasarih vel zet an laih belh theihna state lo nih mai hi a fel lo hle. International border hi sorkar laipui ven tur chu ni bawk mah se, kan ram chhunga kawngpui sial chawp chin lo dan hi chu state sorkar tih theih a ni chiang a, mahni state-a dan loa sumdawnna kalkawng tur an sial hmu reng sia sorkar laipui lam chinfeltir tum tlat kan ang lek lek a ni.

Mizoram Rajya Sabha MP ṭhahnem-ngaihna hi sorkar laipui lamin an rawn bawhzui vat lo a nih pawhin Mizoram sorkar hian a bawhzui ran a ngai a, dan loa sumdawnna tur kawngpui pasarih zet an sial tlang tih hi Parliament House-ah ngei sawi a ni tawh a, hei hi Mizoram sorkar hian a ngaimawh a nih chuan Mizoram chhung chinah hian a titawp mai tur a ni - Mizoram sorkarin ramria dan loa sumdawnna hi a dang ngam nge ngam lo mipuiin an thlir dawn a ni.