Medical college ṭha mamawhna a sâng

Sorkar laipuia Ministry of Health & Family Welfare chuan Mizoram chu kum 2019-20 aṭangin central pool-a Bachelor of Medicine, Bachelor of Surgery (MBBS) seat a pe tawh lo a, BDS seat erawh panga a pe. Mizoramin MBBS seat a neih loh chhan chu medical college a neih tawh vang a nih thu Higher & Technical Education (HTE) department chuan an tarlang. 

Mizoram hian ama pualin medical college a nei ta a, Zo­ram Medical College (ZMC)-ah seat 70 a neih bakah NEC aṭangin seat 14 a nei a, a vaiin seat 84 a nei dawn ta a ni. Kum dangah chuan central pool aṭangin seat kan neih avangin kan MBBS zirlaite pawhin India rama zirna in ṭha ber berah seat an hmu ṭhin a, tunah chuan chu chu a hmuh theih tawh dawn lo a ni ber mai. 

Hei vang tak hian kan medical doctor neihte quality a tlahniam palh ang tih a hlauhawm a, a zirlai chu eng anga thiam pawh ni se, a zir chhuahnain a zir loh chuan a nih tur ang a ni phak lo ve thei. Tun hma zawng chuan India rama zirna in ṭha ber ber kan ban phak ṭhin a, doctor thiam tak tak kan nei a, doctor ṭha tak nei chhunzawm turin a zirna in ṭha kan neih a pawimawh hle. 

Tunah chuan, 'ZMC a ṭhat leh kan doctor chhuak thar tur an ṭha ang a, ZMC a ṭhat loh chuan doctor kan nei ṭha vak dawn lo,' ti ang deuhin a sawi theih a, hei vang hian kan medical college neih chhun hi ṭha taka kan thuam a, India rama zahpuiawm loa kan chhuah ngei a ngai ta a, sorkarin theihtawp a chhuah a ngai dawn a ni.