Mipui nge hruaitu?

Transport Minister chuan tun hnaia a bial chhunga New Champhai, Zotlang leh Ruantlang tlawhin, khawtlang hruaitute nen an inkâwm a; hmasawnna tluantling leh tlo nei turin mipui rilru sûkthlêk siam dik hmasak a ngaih thu a sawi. 

Kan ram hruaitute thusawi kan ngaih­thlak ṭhinah hian kawng tam takah mipui demna ang lek lek hi a ri chhuak fo a, hei hi tun hma aṭanga kan ram hruaitu hrang hrangte thusawi dan a ni fo mai. Ram hrang hrang hi ngun taka kan thlir chuan an din chhuah leh an tlak chhiat hi an mipuite vang lam ni loin ram hruaitute vang a ni deuh zel. 

Mizoramin hma a sawn loh chhan te, hmasawnna tluantling a awm hleihtheih loh chhan hi mipui lam an nih loh hmel. Chutih rualin mipuite hian mawhphurhna an nei a, ram ṭhat leh chhiatah hian an ral bang thei hauh lo ang. Ramin hma a sawn dawn chuan mipui ṭha chu an ngai teh meuh mai; nimahsela mipui chuan kai­hruaitu hruaitu ṭha an mamawh a ni. 

Kan thlir dan hi ngun taka kan ngaih­tuah a ngai a, mipui ṭha pawimawh­na kan sawi rual hian mipuite ṭha taka an awm theihna turin hruaitu ṭha an pawimawh. Kan ram hruaitute hian mipui ṭha an awm theihna turin ṭan la se, chumi hawi zawng chuan ngaihtuahna pawh seng se a lawmawm khawp ang.