Oil pawlh dal leh Mizoram

Central YMA hnuaia Vigilance Committee-te chuan Vairengte Police-te nen ṭang kawpin tun hnai khan Vairengte chhehvelah oil pawlh dal hralh chhuah mai tura siam thawh eng emaw zat an man. 

Mizorama kan buaina lian tak pakhat chu kan lirtheite nunna hnar ber kan oil (petrol leh diesel) chhe lutuk hi a ni a, mi ṭhenkhat chuan India rama lirthei tui nei chhe/dal ber ang hialin min sawi ṭhin. Sorkarna a inthlak pawhin oil pawlh dal veng thiam sorkar hi Mizoram hian a la nei fuh lo a ang ber a, he lam buaipuitu tur bika hlawh neia rawih kan sorkar hnathawkte pawhin an hre fuh lo nge an hai der tih hriatthiam harsa khawpin oil pawlh dal hi Mizoramah a hluar a ni. Oil pawlh dal mai ni loin dan loa (black) oil zawrh pawh a nasa a, Aizawl khawpui lun lai berah pawh khaw en laiin dan loa oil zawrhna a intlar ṭhut reng a, Mizoram sorkar chuan a thlir liam mai mai a ni ber e. 

Vairengte leh a chhevelah oil an pawlh dal ṭhin tihte pawh hi tlang hriat a ni a, a taka man tur emaw, a hlawm liana an man thawm erawh hriat a ni ngai meuh lo. Oil pawlh dal avanga kan lirtheiin a tawrh dan te, lirthei siamna atana sum a riral hnemzia te chhut hian oil pawlh dal hi hnam pawikhawihna ang hiala ngaih theih a ni ang. 

Central YMA-in oil pawlh dal an man chhuak hi a lawm­awm a, hei hi tha thlah loa beih zel chi a ni. Anni meuh pawhin oil pawlh dal tur hi an veng hneh lo a nih chuan, Mizoram mipuite tan oil ṭha neih ni a her chhuak ve lo mai ang tih a hlauhawm ta hial a ni.