AMC campaign hun a tawp ta MPF-in ṭan zui thei se

Aizawl Municipal Corporation (AMC) inthlanna chu February 16, 2021-ah neih a ni dawn a, he inthlan atana campaign hun chu a tawp fel ta a, hei vang hian dan ang chuan inthlana vote zawnga campaign phal a ni tawh lo.

Tun hma deuh chuan inthlan dawn hnai takah hian vote zawngtu ṭhenkhatin thil sem an ching an ti a, sum leh therhlo sem hi sawi tur a awm fo. Mi ṭhenkhat sawi danin inthlan dawn hnai tawh hun tepter takah hian politician ṭhenkhat chuan sum hmangin vote zawn an ching a, sum mamawh deuh leh lei theiha an ngaihte hi zan reh tawhahte an tlawh a, sum an sem ṭhin a ni awm e. 

Tun ṭuma inthlan hi Aizawl khawpuiah inthlan tur a ni a, hetianga inlei leh mawi lo taka campaign hi a awm lohna turin veng tinah Mizoram People Forum (MPF) lamin duty siam thei se duhthusam a ni. An duty em loh pawhin hetiang tih chingte an huangtau lohna tura thuchhuah siam emaw, veng tin tlangaute autir emaw pawh a ṭhat hmel a; campaign hun tawp tawh hnua campaign hrim hrim hi dan kalh a nih piah lamah sum leh therhlo hmanga vote zawn phei chu tih loh tawp tur a ni. 

Campaign hun tawp tawh si-ah hian tute emaw tana chhân lêt remchang tawh si loa campaign rawngkaia ke pen pawh a awm thei a, hengte hi State Election Commission lamin hauin khak ve ṭhin mah se, a tilui duh an awm chuan inthlanin a nangching zui tawha an tih duh chin chu an ti zo tawh tho ṭhin. Chuvangin, MPF lamin thawm nei ṭhin se hei hi candidate lam pawhin an zah leh hlauh ber a nih a rinawm. 

Engpawhnise kha chen kha campaign-na hun ṭha a awm a, hun tawp hnua chet lak hi dan bawhchhiatna a nih avangin mipui lam pawhin hnawl ngam ila, MPF lamin campaign phal tawh loh hnua campaign tum an awm leh awm loh veng thei bawk se a ṭha hle ang.