Sumdawnna en zui ngai
Kolasib DC leh sorkar hotu dangte chuan tun hnai khan NH-54 kawngpui, Vairengte leh Chhimluang khaw inkar an enfiah a, dan phal loha kudam sak 20 chuang an hmu chhuak a; heng kudama an dah ṭhin kuhva leh lei-
ṭha eng emaw zat an man nghal.
Mizoram kal tlanga sumdawnna liantham an kalpui langsar ber pawl chu kuva leh leiṭha sumdawnna hi a ni awm e. Khawchhak aṭangin kuhva tam tham tak an rawn phur thla a, vairam lam aṭangin leiṭha (fertiliser) an phur chho reng bawk a, he insumdawn tawnna hi hun rei deuh tak chu kalpui a ni tawh. A ruh langa sawi dawn chuan he sumdawnnaah hian Mizoram hi chu a kalkawng ang deuh mai kan ni a, Mizo sumdawng ṭhenkhatin a hlawkna tel ve bawk mah se, kuhva thartu kan ni lo a, leiṭha siam chhuaktu kan nih loh bawk avangin tute emaw sumdawnna kawng kan ni ta ber mai.
He sumdawnnaah hian Kolasib DC chuan kuhva rah leh leiṭha dah khawmna hmun kudam chu The Warehouse (Development and Regulation) Act kalh a nih thu a sawi a, dan hnuaia kalpui a ni em tih finfiah turin lehkha pawimawh hmuh tur a awm lo tih a sawi bawk. Heti taka sumdawnna lian tham, kan ram kawngpuiin nasa taka a tawrh mek ni bawk hi dan loa kalpui a lo ni palh a nih chuan a zialo ngawt ang.
Zep thu a cheng lo a, kuhva leh leiṭha sumdawnna avang hian kan kawngpui pawhin a tuar nasa a, chuti a nih chuan dan anga chhiah lak emaw, dan ang taka kalpui emaw chu a ṭul takzet tawh a, dan loa sumdawnna a nih phei chuan dan anga kalpui a nih hma chu thuneitu lamin an vil a, an en zui a ngai a ni.