Kan state leh ṭhenawmte ṭhatpui tham mau

Mizoram Chief minister chuan tun hnai khan Union Agriculture & Farmers Welfare leh Rural Development changtu minister a kawm a, rua chungchanga a hmachhawpte a hrilh a; rua hmanga Mizoram mai ni lo, India hmarchhak bial pum leh ṭhenawm ramte thlenga an ṭhatpui theih dan tur te, chutiang atana a hmachhawpte leh hmalak dante a hrilh. Scheme awm sa aṭang mai ni loin, scheme thar, project thar leh special package hial pawh ruahman a ngaih tur thu a sawi. 

Mizoram Chief Minister hian rua hi an flagship programme a nih thu a lo sawi tawh a, hemi hmanga hlawhtlin ngei a tum ruh hle tih a chiang. Rua chungchang a fakna lamah IAS hna bansana buaipui tham a nih thu te, hmar chhaka helna tihreh theihna hmanrua a nih thute a sawi tawh a. Hei hi raw ṭhatzia leh din chhuahpui theih a nihzia a sawina a nih hmel. 

Tunah kan state hotupa ber chuan Union Agriculture minister a hmu a, chutah chuan rua chu Mizoramin a ṭhatpui theih dan tur sawipui mai a duhtawk lo a, India hmar chhak bial pumin a ṭhatpui dan tur a sawi a, chutah chuan tawp mai ni loin India ram pawn pawh sawi kêpin ṭhenawm ramte thlenga an ṭhatpui dan tur a sawi. 

Engpawhnise kan CM hian ama remhriatna leh ṭhahnemngaihna aṭanga sawi chhuak mai a ni lo ang tih a rin theih a, kan ramin a hlawkpui dan mai piah lama kan ṭhenawm state-te leh kan ṭhenawm ramte hialin a ṭhatpui dan turte thlengin a sawi thei a, mithiamte nen an sawiho tawh ngei ang tih a rin theih. 

Tunah chuan Mizoram mipui pawhin mau leh rua hi a dinchhuahpui theih ang tih hi kan hre tlang tawh a, a taka thawha sorkarin a kalpui hlan hi mipuiin an nghakhlel a ni. Kan state hotupa sawi angin keimahni, kan ram, kan ṭhenawm state leh ṭhenawm ramte thlengin a ṭhatpui hun hi a nghahhlelhawm khawp mai.