MST hmalam hun

Mizoram sorkara Transport department chuan kum hnih chhung, financial year 2017-18 leh 2018-19 chhung khan Mizoram State Transport (MST) bus enkawlna aṭangin Rs. 84,47,741 a hloh. 

MST bus hi private bus-te nena khaikhin hleihtheih loh a ni a, a chhan chu a hlawkna tur hmunah chauh an tlan lo a, mipui mamawhna hmunah private lirtheite pawh an tlan duh vak lohna hmunah an tlantir ṭhin niin Transport department hotute chuan an sawi. Hei bakah hian kum upa zawk te, cancer veite leh mitdelte chu man hniam zawkin an chuantir ṭhin bawk a ni. 

Hetihlai hian RTI Act hmanga zawhna an chhan dan aṭanga a lan danin tuna MST bus 36-te tlan mekna hi khaw kilkhawr leh kalpawh harsa ber ber an ni lo a, private lirtheite pawh hlawkna neia an tlanna hmun a ni deuh vek mai. Tunah hian Aizawl aṭangin khaw 12 - Guwahati, Silchar, Marpara, Mímbung, Kàwlbêm, Saipûm, Zohmun, Khuangthing, Fárkawn, Khawhai, Teikhang leh Lunglei-ah an tlan a; Kolasib leh Silchar inkara an tlan bakah Siaha leh Laki inkarahte an tlan mek bawk a ni. 

Tun hma chuan MST bus te kha an ṭangkaiin an pawimawh em em a, an tel loin zin veivah theih a ni lo. Thil a inthlak chho ve zel a, tunah chuan lirthei te zawk leh remchang zawk, chuan nuam leh tlan chak tak takte a awm tawh avangin MST bus-a chuang ṭhin hi an tla hniam ta tih kan pawm ngam a hun. 

Thawh chhuah nei lem lo state-in khaw 20 pawh tling lo inkalpawhna atana bus tlantir mana kum hnih chhunga cheng nuai 80 chuang hloh hi a tam lulai lutuk a, ennawn ngei a ṭha ang. MST bus hi a kalphung ennawn a nih loh chuan, tun ang zela hloh tam lutuka kal luih tir zel chi niin a lang lo a, sorkar hian thil inthlak chho mek hi thlirin MST bus hmalam hun hi ngun takin ngaihtuah rawh se.