Vil zui ngai sumdawnna

Kolasib DC chuan tun hnai khan an district chhunga Kuhva leh leiṭha hmanga sumdawnna atana an hman kudam eng emaw zat a kalhsak. Hei hi sawifiahin kuhva rah chu ramria insumdawn tawnna thil a nih thu sawiin, "Tumahin licence an nei pawhin ka ring lo. Leiṭha chu a supply turin sorkarin approved dealer an nei a, anni lo chuan an supply ngawt thei lo. Document fel tak an nei a nih loh chuan kudamah hian kuhva leh leiṭhate dah kan phal tawh dawn lo," a ti. 

Hun rei tak chhung an lo kalpui tawh, mipui nawlpui lam phei chuan dan ang taka thil kalpui anga an lo ngaih hial tawh nia lang, Kuhva leh leiṭha hmanga sumdawnna sorkar mi leh sa lamin dan lo a nih thu rawn hai lang a, huaisen taka kudam a kalhsak hian nghawng a nei thui dawn hle niin a lang. 

Tuna Kolasib district lama kudam sak a nih hma daih tawh hian Champhai district lama hmun eng emaw zatah kudam hi sak a ni a, mi tam tak eizawnna niin an lo kalpui rei tawh hle. Champhai leh Zokhawthar inkara kawngpui kama hmun rem deuhte chu Kuhva leh leiṭha kudamin a khat a ni thawthang tawh. Kolasib DC-in a huam chhunga kudamte endik a, a kalhsak a nih chuan, mi naran (layman) chhutnaah pawh Champhai lam kudamte hi Dan anga sak a ni bikin a rinawm lo a, enzui ngei ngai chi a ni. Thil hi a titu an len a, a titu an tam deuh chuan ngaimawh loa thlir liam mai theih a ni a; nimahsela Mizoram chhunga district danga dan lo chetna hi hi Champhai district a nih vangin 'dan ang' a ni bik ngawt thiang lo a, sorkarin a enpui a, a vil zui ngei a ngai. 

Sumdawnna hi Dan anga kalpui a nih loh phei chuan a phurtu lirtheiin chhiah an pek dante thlengin en zui a ngai a. Kan kawngpui ṭha rap chhetu motor lian rit tak takte hian sorkarah dan angin chhiah an lo pe miah lo thei tlat a ni. Hetih lai hian Champhai district chhunga sorkar chhiah khawn pangngai ni lo, lirtheia bungraw phurte chhiah (pawisa) lâk dan hun rei tak kalpui tawh pawh hi sorkarin dan anga a enzui ngam a ngai ta. Tunah chuan mahni 'area' tia kan phuah chawp chhungah pawl indinin kan duh ang angin pawisa kan khawn ngawt a ang ber. 

Engpawhnise he sumdawnna lian tak mai, hun rei tak lo kal tawh hi mi ṭhahnem takin eizawnna atan an lo hmang tawh a ni thei a, vawi leh khata tihtawp rup chu a fuh lo mai thei. Chutihlaiin dan lo a nih miau si chuan dan ang taka an kalpui a ngai a, sorkarin hun pe se, dan hnuaia sumdawnna an kalpui theih dan kawh hmuh se; hun tiam a ral hnuah erawh dan angin khauh taka vil zui chi a nih hmel.