Ei leh bara intodelh

Mizoram chief minister chuan ei leh bara intodelh tuma sorkarin ṭan lâk nasat a tum thu tun hnaia Delhi-a Mizo zirlaite bulah a sawi a. Chawa intodelh tura hmalak dan turte sawiin SEDP hnuaiah ruahmanna an siam thu a sawi a, rua leh mau hmanga hmalak tum a nih thute a sawi lang bawk. 

Mizoram har­satna lian ber pakhat chu kan ei khawp kan thar chhuak lo hi a ni. Industry liante nei loin eizawnna tur lian tham dangte awm lo mah se, ei leh barah tal intodelh ila a ziaawm tur a ni a; nimahsela kan nitin ei leh in takngial pawh state pawn aṭanga lakluh zel a ngaih avangin kan dinhmun hi a la harsa hle. 

Tun hmaa Mizo pi leh pute kha lo neia ei zawng deuh vek an ni a, Mizo chhungkua dam ṭha pangngai chu an intodelh vek tiin a sawi theih ang. Chu ramah tho chuan kan la cheng a, tun hmaa kan banphak ngai loh lo neihna hmanraw ṭha zawk leh remchang zawk ṭhahnem tak kan neih belh chungin, Mizoramah rilṭamin Mizote kan cheng mek tho a ni. 

Mizoram kan intodelh loh chhan leh khawsak phunga harsa tak hnam kan han ti ta mai hian chhan tam tak a nei ngei ang a, kan tihfuh loh tam takte sawi chhuak a, dem tur zawnga a phunchiar zawnga kal mai lo a, hmalam pana intodelh tura ke pen a hun ta. 

Chief minister ngeiin kan ram din­hmun a hre chiang a, kan harsatna tawh mek pawh a hria a, chawa intodelh tum a nih thu a sawi chhuak hi a lawmawm hle. Sorkarin thil a vei a, a tih tak tak duh chuan pawisa hi chu a awm thei zel tih NLUP kalpui dan aṭangin kan hmu tawh. Sorkar thar hian chawa intodelh hi a ngai pawimawh tak tak dawn a nih chuan chumi kawngah chuan sum ṭhahnem zawk dah se, ruahmanna fel tak nen thlai leh buh ṭhat duhna ramah hian kan intodelh ngei theihna tur khawpin ṭan han la teh se.