AMC inthlan i ngai pawimawh ang u

Aizawl Municipal Cor­poration (AMC) inthlan ni a lo ni ta a, kum nga chhung Aizawl khawpui enkawltu tur an ni dâwn a; tun hi AMC in­thlan vawi thumna tur a ni ang. 

AMC huam chhunga awm vote nei zawng zawngte chuan vote thlak ṭheuh ni se, kan vote a pawimawh a ni tih hi kan hriat a pawimawh. Mi ṭhenkhat chuan MLA inthlan a nih loh chuan vote thlak loh mai kan ching a, democracy ramah chuan inthlan hi a pawimawh em em vek a, democracy laimu pakhat chu duhthlanna thiang tak hmanga zalen taka vote thlak theih hi a ni. 

Vote pawimawh bîk leh pawimawh lo bîk a awm lo a, mi tinin vote khat ṭheuh kan neih tling khawm hian khawpui hruaitu tur a hril dâwn a ni. Chuvangin, inthlanah hian mi tin mai kan pawimawh dan a inchen a tih theih ang. 

Kumina AMC inthlang tur hi kil thum lian tak takin an inchuh dâwn niin a lang a, a tute pawh hi tling se an din chhan Aizawl khawpui leh a chhunga chengte enkawl hna hi uluk takin thawk se. State dangin municipal corporation an hmang ṭangkai a, khawpuiin hma a sawn phah angin AMC hian Aizawl khawpui hmel hmang hi thlak danglam ve tawh rawh se. 

AMC inthlanah hian Aizawl khawpui huam chhunga vote nei zawng zawngin vote thlak ṭheuh ni rawh se.