Kawngpui

Congress Ṭhalai, Mizoram Pradesh Youth Congress Committee (MPYCC) chuan tun hnai khan Sairang leh Kawnpui inkar NH-54 kawngpui an enfiah a; kawngpui chu a chhe hle tih sawiin, MNF sorkarin kawng an lo siam tak tak lo tih an hmuh chhuah thu an tarlang a, "Tun thla riat chhung hian sorkarin kawngpui siam an ngaihthah hle tih kan finfiah. Congress sorkar lai khan kawng siamna tur cheng nuai sing chuang dah a ni a, pawisa hi sorkar thar MNF kutah awmin an hmang thiam lo a, ei leh bara Mizoram châwmna kawng ber pawh an siam duh lo a ni," an ti. 

Congress hi sorkarna an chanlaia an mualphona lian ber chu kawngpui an ngaihthah kha a ni a, kawng a chhiat avangin a ram pumin kan rûm kha a ni deuh ber. Hetihlaia MNF-in sorkarna an chang deuh chiah tiha kawngpui siam nghal zung zung tura an phût hi mahni mawng hlimna ang mai a ni a, "Kan hunlaia kan siam ṭhat theih loh kha an la siam ṭha thei bik lo a nih hi," tihna ang lek a ni thei. 

MNF hian sorkarna vawnfung an chelh tirh khan theihtawp chhuahin kawngpui siam hna hi Mizoram hmun hrang hrangah an thawk a. Congress ṭhalaite sawi ang hian Congress khan pawisa ṭhahnem tak an hnutchhiah a, kha kha hmang ṭangkaiin kawngpui chhelai an thawm nasa hman hle a ni. Tunah thla riat chiah an la sorkar a, kawngpui siam kawnga an hma­laknaah mipui fak pawh an phu hle a ni. 

Chutihlaiin MNF pawhin Mizorama fur laia kawngpui siam harsatzia chu a takin an tawng ve mek a, kan kawngpuite hi ṭhal laia a hun taka siam a nih theihna turin pawisa awm sa tal hi chu a nihna tur dik taka hman ṭhin ni se, state dangte ang bawkin Mizoram mipuite pawhin kawngpui ṭha tak neih hi an phû a ni.