Ramriah huaisen a ṭul

Zoram Peoples' Movement (ZPM) party ṭhalaite chuan, Bairabi Zophaia Assam lam mite'n in leh mosque an sakna bul velah Assam police-te an duty laiin, Mizoram police duty hmuh tur an awm ve loh thu an tarlang a; "Mizoram sorkarin ramri chungchangah Mizo mipuite min mualpho a ni," an ti. 

ZPM ṭhalaite thuchhuah hi poli­tics-a hamṭhatna zawnna leh midangte tihmualphona mai mai a ni thei a, chutihlaiin thu dik a nih si chuan Mizo­ram sorkar tan a mualphothlak hle a ni. Mizo­ram leh Assam inkar boruak awm mekah hian a dawih zawk leh a tlanchhe zawka kan ṭang zel a nih chuan min nek zel dawn a ni ber a, huaisen taka chet hun sorkarin a neih a ṭul takzet a ni. 

Zophai hmun hi Assam leh Mizoram lamin kutthlak loh ve ve (status quo) tura an dah a ni a, chutihlaiin Assam lamin chet an la hmasa leh ṭhin pawh hi a ngaimawhawm a, chumi piah lamah kan ram chhung ngei Zophaia-a status quo tia kan inrem fel mai pawh hi tlawmna chi khat chu a ni tawh hrim hrim. 

Kan sorkar coun­cil of minister ṭhu­­khawm phei chuan Bengal Eas­tern Frontier Regu­lations (BEFR) 1875 chu ramri atan a pawm tawh a, a ramri pawm hi a thuphunga pawm ve mai mai an nih ngawt loh chuan an ramri pawm chhung ngeia kan sorkar chet vel dan thlir hian, ramri chungchangah hian a tlanchhe zawkah kan ṭang zel a ni lo maw?